粤劇日2023｜免費粤劇折子戲演出、粤曲演唱及廣東音樂演奏、講座、示範及展覽

粤劇日2023 活動 1) 粤劇折子戲

粤劇唔再係老一輩嘅專屬娛樂，而係一種文化傳承。講到粤劇日嘅重頭戲非「粤劇折子戲」演出莫屬！一班年紀小小嘅粤劇新秀將於11月26日下午，喺香港文化中心音樂廳輪流登台演出，同大家一齊發掘粤劇嘅樂趣。當中有不少耳熟能詳嘅劇目，例如《獅吼記》之〈跪池〉、《紫釵記》之〈花前遇俠〉、《花田八喜》之〈棧會〉等。經典劇目與年輕一代嘅演繹，到底會擦出點樣嘅火花呢？相當令人期待！

粤劇日2023 活動 2) 粤曲演唱及廣東音樂演奏

粤曲及廣東音樂可以話係現代流行曲嘅雛型，唔同嘅二黃及梆子等板腔令粤劇唱起嚟有獨特嘅韻味。今次「粤劇日」帶來多位第七十五屆香港學校音樂節粤曲比賽優勝者嘅演出，由小學、中學、大學及專上學院嘅學生都有。多位冠軍人馬演繹佢嘅得獎曲目包括《江山錦繡月團圓》之〈智盜名單〉、《鳳閣恩仇未了情》及《有情活把鴛鴦葬》等。除此之外，大堂當日仲有加碼節目，音樂事務署香港青年中樂團小組會帶嚟多首耳熟能詳嘅廣東音樂，炒熱氣氛！

粤劇日2023 活動 3) 化妝及戲服穿戴示範

除咗精彩嘅表演，今次仲可以從多角度認識粤劇呢項世界級非物質文化遺產。文化中心行政大樓四樓當日會舉辦兩場化妝及戲服穿戴示範，參加者可以近距離睇到演員「開面」及「裝身」等過程。無論是一家大小，定係喜歡粤劇文化嘅朋友都不容錯過！

粤劇日2023 活動 4) 花旦頭飾製作示範

行政大樓活動亦包括兩場花旦頭飾「繞花」及「片子石」製作示範，由資深導師作現場講解及示範當中精巧手藝，讓現場觀眾認識blink blink嘅花旦頭飾如何誕生！

粤劇日2023 活動 5) 音樂及唱腔藝術講座

行政大樓四樓同場仲有兩場精彩嘅藝術講座，涵蓋粤劇唱腔技巧及音樂賞析。講座由香港演藝學院戲曲學院嘅楊雅雲老師及周仕深博士分別探討粤曲唱腔變化技巧及長句梆子滾花唱段，仲會同觀眾齊齊試唱，有興趣嘅朋友不妨同佢哋深入交流一番。

粤劇日2023 活動 6) 粤劇學習聊天室

近年粤劇呢門藝術原來都吸引咗好多年輕新一代去學習，而且小小年紀已經登台演出。今年「粤劇學習聊天室」講座，有任梓銣導師連同5位兒童及少年學員，喺香港太空館演講廳分享佢哋教戲、習藝嘅點滴，希望將呢個文化傳承到下一代。

粤劇日2023 活動 7) 「粤劇在香港」展覽

為咗響應「粤劇日」嘅活動，香港文化中心大堂嘅展覽場地亦會於11月21日至26日舉辦由香港文化博物館協辦嘅「粤劇在香港」展覽，大家可以了解更多粤劇嘅文化與歷史。

再提提大家，之前未有網上登記音樂廳表演門票而又想入場嘅朋友唔洗發愁，當日下午1時15分起，喺香港文化中心音樂廳入口會有少量門票即場派發，所有入場人士仲可以免費換領紀念品一份，記得準時出席呀！其他各場示範及講座門票都會喺每場節目開始前十五分鐘於各場地入口派發，先到先得。到時見！

－－－－－－－－－－－－－－

粤劇日2023
日期：2023年11月26日（星期日）
時間：2:00-5:30pm
地點：香港文化中心和香港太空館
了解更多：https://bit.ly/46ti1vY

－－－－－－－－－－－－－－

(Presented by LCSD)