【周末遊懶人包】秋日限定！馬鞍山芒草遊 睇埋礦村秘景！

由馬鞍山郊遊徑入口開始行，指示牌上話只需要行半個鐘就去到昂平，不過記者實測，慢慢行嘅話，由入口行到昂平高原，都差唔多要一個鐘。

上到昂平高原之後，就可以眺望西貢，不時有滑翔傘愛好者會選擇喺呢片草原上飛翔。

一場嚟到，就梗係要同芒草合照，影返張靚相呃like啦！不過心急嘅記者上星期已經急不及待咁去睇芒草，結果只係開咗小部分，如果想睇到成個山頭都係芒草嘅盛況，就要等多一兩個星期喇～

不過影相影之餘，都要留意住附近嘅牛牛，因為身處草叢入面，視線被遮擋，記者當日掛住影相，爭d就撞咗埋佢哋度！

配合埋陽光，芒草影出嚟就更加靚喇！

除咗芒草之外，附近嘅大金鐘亦都係影相位！

如果喺呢度扎營過一晚夜嘅話，仲可以睇埋日出添！

昂平高原

路線：馬鞍山郊遊徑至昂平高原
時間：約1小時
難度：✭✩✩✩✩
前往方法：由馬鞍山坐的士到馬鞍山郊遊徑昂平入口，車費約$50；或於馬鞍山新港城中心乘村巴NR84，於總站馬鞍山村落車。

落返山，可以去埋附近嘅馬鞍山村，呢度係香港唯一具規模嘅礦村，嚟到就好似行咗入時光隧道咁，因為一切都停留咗喺70年代礦場停產之時，可以影出與別不同嘅靚相。

方濟會天主堂同信義會恩光堂都曾經係礦村嘅社區中心，仲開辦幼稚園同小學，但係隨住礦場結束，學校已停辦。信義會上年開始活化小教堂及學校，整理礦工及村民嘅口述歷史，教育大眾認識礦場。

叫得礦村，就一定有礦洞，不過目前幾乎所有洞口都已經封死，只有「半封口」嘅240ML，呢度唔封口並唔代表入面安全，只係因為洞內有好多蝙蝠，所以千祈唔好隨便入去探險！

行咗咁耐，係時候去搵食！相信cafe迷對「屋子」都唔會陌生，呢度出晒名環境靚，樓底有成6米高，可以舒舒服服咁坐吓食吓影吓！

除咗餐牌上嘅食物，一場嚟到，當然要食埋個環境！

屋子生活

地址：馬鞍山烏溪沙路八號迎海薈地下四號舖 (顯示地圖)
電話：2662 0102
時間：星期一至五11:30am-10pm、星期六及日12nn-10pm

延伸閱讀
【周末攻略】 6大市區野餐好去處
【周末遊懶人包】荃灣生活百貨精華遊 兩大日店首次進駐香港
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK

新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！
想最快接收第一手的旅遊飲食資訊？Easy！
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按扭下揀選「搶先看」，搞掂！