睇日落好去處！精選香港5大夕陽靚景 打卡必到！唔只西環碼頭！

打卡必到！5大香港日落靚景

01｜下白泥

相信香港人對下白泥都唔陌生，呢度係新界最西面嘅地方之一，所以出咗名可以睇到靚日落！有體力嘅話，仲可以由屯門良田坳行入去，路程大約兩小時，沿途風景都好靚。

不過下白泥靚就靚喇，交通就比較唔方便，目前只得一架33號小巴來往元朗同下白泥。日落之後，排隊等小巴嘅人龍絕對會嚇親你，而且20分鐘先一班車，記者試過足足等咗兩個鐘先上到車呀嗚嗚！

交通：★☆☆☆☆
難度：★☆☆☆☆
靚景指數：★★★★☆

02｜機場維修區

呢度係另一個少有可以睇到太陽從海平面消失嘅地方，完全冇高樓大廈遮掩，只要天氣符合預期，就可以影到靚靚日落！除咗日落之外，仲可以近距離睇到飛機升降。

記者當日由東涌踩單車去到機場維修區，都只係大約1小時，不過只有大約一半路程有單車徑，接近飛機維修區嘅路段都要踩馬路或者行人路，記住要注意安全。如果唔想踩單車，亦可以喺東涌搭S52巴士，班次都算密。呢度嘅草地亦可以影到好多靚相～

交通：★★★☆☆
難度：★☆☆☆☆
靚景指數：★★★★★

03｜南朗山

海洋公園就去得多喇，附近嘅南朗山你又去過未？以黃竹坑巴士總站起點，15分鐘就可以去到南朗山休憩公園，再行45分鐘就可以到達山頂停機坪。近至深灣、海洋公園，遠至南丫瓜、鴨脷排、香港仔避風塘嘅景色都可以盡收眼底！

交通：★★★☆☆

難度：★★☆☆☆
靚景指數：★★★★☆

04｜蛇嶺

近年先開放嘅蛇嶺，以往一直都係邊境禁區，所以識得嚟嘅人並唔多，由馬草壟軍營小巴站行到山頂，都只係需要45分鐘，呢個毫無阻擋嘅小山丘，絕對係睇日落嘅好地方！

除咗日落之外，呢度嘅夜景亦都好吸引！

交通：★☆☆☆☆
難度：★★☆☆☆
靚景指數：★★★★☆

05｜九龍炮台山

呢個炮台山並唔係講緊港島線港鐵站嗰個炮台山，而係油塘附近嘅炮台山，又稱魔鬼山。由油塘港鐵站一出，往鯉魚門邨方向，經衛奕信徑第三段就可以到達炮台山，呢度絕對係睇維港景色嘅九龍區代表！

交通：★★★★☆
難度：★★☆☆☆
靚景指數：★★★★★

撰文：新假期編輯部｜圖片：新假期資料室、流浪攝