新年好去處2025 九龍城寨之圍城沉浸式電影展覽 重現寨城風貌
新年除咗拜年仲有咩做？不如去啟德AIRSIDE參觀由香港旅遊發展局呈獻嘅《九龍城寨之圍城》升級版電影展覽，體驗舊香港風情。今次展覽設於電影故事核心嘅九龍城，帶來令人難忘嘅沉浸式體驗，彷彿置身於電影之中，畀你一邊打卡，一邊了解香港歷史文化，體驗九龍城寨嘅獨特魅力。
升級沉浸式電影體驗
展覽高度還原戲中錯綜複雜嘅後巷同室內場景，現場伴隨住飛機聲同斬叉燒聲，仲會聽到電影入面嘅對白同聲效，好似置身喺電影裡面咁！
5大新增打卡位
除咗髮廊、冰室、後巷、四個主角嘅房間等經典電影場面外，今次展覽處處都有不可錯過嘅打卡位，好似漫畫攤、裁縫店、跌打舖、鞋匠店同牙醫診所等。入面嘅擺設造型同價錢牌都係參照當年實物嚟整，重現80年代嘅寨城風情，等你可以穿越時空，親身體驗當年嘅生活！
驚喜彩蛋
展覽入面仲隱藏咗好多驚喜彩蛋，包括多件電影演員戲服、模仿80年代漫畫風格嘅城寨六子漫畫，大人細路一樣睇得過癮！
場外仲有好多延伸體驗，有售賣經典港式美食嘅冰室、提供傳統地道涼茶飲料嘅涼茶舖、售賣懷舊零食同玩具嘅士多，最特別嘅係仲有得買由電影發行商「無限動力」特別設計嘅限量主題精品，包括城寨模型、城寨保溫瓶、T恤等，戲迷絕對要入手！
展覽由即日起至2025年4月13日，喺啟德AIRSIDE一樓108號舖舉行，開放時間由上午11點至晚上9點，初一至初三都會照常開放，農曆新年假期可以嚟參觀，一齊穿越返去舊香港感受人情風貌，再行一行九龍城同啟德呢區，來個新舊對比，感受香港呢個城市嘅獨特故事，絕對係一個難忘嘅假期體驗！
《九龍城寨之圍城》電影展覽詳情
日期：即日至2025年4月13日
開放時間：上午11時至晚上9時
地址：九龍城啟德協調道2號 AIRSIDE 一樓108號舖
（Presented by：香港旅遊發展局）
圖片來源：香港旅遊發展局
