劍擊訓練班記者初體驗！不斷流汗＋勁考反應！教練兼張家朗10年老友大爆：佢訓練個時好勤力！

Jul 30 2021

港隊劍擊花劍選手張家朗擊敗意大利選手，奪得奧運劍擊項目金牌，成為全港第2名奧運金牌選手，為港爭光！當全港都為張家朗亮麗的成績歡呼時，亦被運動員在場上的英姿及堅毅精神吸引。到底記者劍擊又幾難？到底好唔好玩？今次就體驗一下劍擊運動樂趣！

撰文：Sumi ｜圖片來源：新假期資料室、官方圖片

劍擊訓練記者初體驗
荔枝角亞洲劍擊學院（香港）教學環境闊落舒適

座落於荔枝角香港中心的亞洲劍擊學院，位置鄰近港鐵荔枝角站B1出口，步行約2分鐘即可到達。院校積極於香港提倡劍擊運動，定期舉辦各項劍擊活動及比賽，小型至中小學劍擊班，大型至國際性賽事亦有。希望從訓練及比賽中，發掘有潛質的運動員，將來接捧為港爭光！院校有多個劍擊花劍課程，小朋友4歲便可參加兒童劍擊預備班，5歲可參加兒童劍擊初班、中班及高班。而青苗劍擊訓練計劃、成人劍擊初班、劍擊中班及高班則不限年齡。

劍擊裝備唔簡單記者：穿上裝備都用咗15分鐘…

劍擊運動裝備有好多，包括一對及膝特定長襪、劍擊褲、單袖衣、長袖保護衣、頭盔，最後因應劍種需要著電衣。平時從電視睇劍擊，見到運動員全身裝備都覺得好累贅！但記者今次試穿過後，原來劍擊裝備服飾非常舒適，亦不算笨重，不過的而且確有點熱，大汗的朋友可能會較辛苦。

而劍擊的頭盔比較重，劍亦有一定重量，所以劍擊運動員比賽時一直「彈下彈下」，其實都相當累。值得一提的是，花劍、佩劍及重劍的劍把都不同，而且每款劍種的有效擊打範圍都不同。以後睇比賽記得唔好搞亂啦～

記者爆笑自肥企劃上場同港隊成員對戰？！

劍擊分為3大類，分別是花劍、重劍及佩劍。而今次記者試玩的是花劍。一場嚟到，當然唔可以放過任何自肥機會啦！捉住教練教記者劍擊步法、不同的進攻及防守技巧，之後仲有機會同港隊隊員對戰！

教練細心指導下，初學者好易上手！（圖片來源：新假期資料室） — 教練細心指導下，身為初學者好易上手！（圖片來源：新假期資料室）

專心練習（圖片來源：新假期資料室） — 面對著「死物目標」，記者的技術暫時未有大問題（圖片來源：新假期資料室）

又好似有模有樣咁喎（圖片來源：新假期資料室） — 又好似有模有樣咁喎（記者自我感覺良好）（圖片來源：新假期資料室）

經過教練悉心指導後，記者表示已經準備就緒，可以迎戰現役港隊成員！記者不忘上場前為自己打打氣，叫道：盲拳打死老師傅啊！Ush！

「比賽」開始時，記者立即感覺得進退失據，一方面又想上前取分，又但怕被對方突擊。心跳不斷加速，好緊張呀！

開始唔夠10秒，港隊先領一分，記者就⋯⋯自己睇啦（圖片來源：新假期資料室） — 開始唔夠10秒，港隊先領一分，記者就⋯⋯（圖片來源：新假期資料室）

記者主動出擊！戰況好激烈啊！（圖片來源：新假期資料室） — 記者嘗試主動出擊！不過當然被教練一一化解！（圖片來源：新假期資料室）

記者試玩後感：劍擊真係唔係睇咁易！港隊加油！

以前睇電視劍擊比賽，以後呢項運動好易，刺中對方就有分。但自己落場試過自知，原來一啲都唔容易！要避開對方攻勢，同時要諗幾時主動進攻，要非常冷靜先可以做到！一直以為把劍係軟嘅，而且著咗保護衣，刺中都唔會痛。今次體驗後先知原來劍係硬嘅，被刺中會有痛感。著上全套裝備後，好快已經出汗。真係不得不佩服所有港隊運動員，喺每次驕人成績後，無人見到嘅汗水同努力！

現役港隊成員兼10年老友大爆：張家朗訓練果時好勤力！每次都見到佢出現！

今次教記者玩劍擊嘅，正是現役香港劍擊隊隊員陳卓謙（Timmy），唔講唔知，原來Timmy同張家朗不但係隊友，仲好老友，已認識超過10年！Timmy表示張家朗係一個好勤力嘅人，無見過佢偷懶：「張家朗啲汗係真㗎，唔係假㗎！」陳卓謙（Timmy）將會代表香港出戰全運會劍擊佩劍項目。要加油呀！香港人支持你！