城門谷公園花朵盛開！必打卡童話風園景＋6米高噴泉＋玫瑰園

城門谷公園花朵盛開！必打卡童話風園景＋6米高噴泉＋玫瑰園

城門谷公園佔地10.73公噸，分咗北園同南園，大家約集合地點嘅時候就記得講清楚，事關兩個入口位都有啲距離，建議想嚟打卡嘅朋友可以喺南園作起步點。

園內動態同靜態嘅康樂設施兼備，最多人認識嘅就一定係南園嘅人工水景、小型瀑布同六米高嘅噴泉！喂！準備好手機未呀，影相位到咗啦！

童話風園景打卡位！玫瑰園＋香花園

大家繼續向前行就會見到玫瑰園同香花園，呢度就係帶你進入童話王國嘅入口。公園種植了不同品種嘅花朵，如寶塔龍船花、毛地黃、波斯菊等，五顏六色的十分鮮艷。

影完花，放眼遠望，最易望到就一定係藍白色風車塔，周圍都種滿花去襯托，好明顯園丁係有用心去設計，啲花好搶眼之餘仲冇撞色；之後就係四周圍都擺放咗唔同姿態同大細嘅天使，要逐個逐個影晒分分鐘都會花你大半日嘅時間；最後就係放置喺地下嘅園地小矮人，有男有女個個樣望落到好chill，細心啲搵，你仲會見到兔仔添！

圓環廣場同松鼠岀沒注意

除咗童話風打卡位，呢個圓環廣場都係打卡熱點！有人嚟呢度影婚紗相、畢業相甚至造型相。而且仲有網民喺IG岀post話喺城門谷公園見到松鼠。大家見到佢嘅時候記得唔好捉佢同餵佢，因為以上兩個行為都係違法㗎！

城門谷公園

地址：荃灣城門道21號

交通：

前往南園及北園

九巴32號路線 （由石圍角邨至奧運港鐵站）

九巴36號路線 （荃灣西站至梨木樹)(循環線）

九巴32M號路線 （由象山邨至葵芳港鐵站）

公共小型巴士 （由海壩街至象山邨）

專線小巴82M號路線 （由兆和街至象山邨）

往南園及運動場

九巴43X號路線 （由沙田耀安邨途經石圍角邨至荃灣西港鐵站）

專線小巴81M號路線 （由兆和街至石圍角邨）

專線小巴94號路線 （由石圍角邨至葵盛邨）