DONKI壽司師博戴手套整壽司！西客嫌唔夠專業出帖圍爐 遭網民炮轟｜飲食熱話

DONKI壽司師博戴手套唔夠專業？原因係……

樓主在Facebook「香港壽司刺身關注組」發帖，上載攝於銅鑼灣Donki 1/F 鮮選壽司的相片，相中師傅正戴著手套整壽司，樓主似乎大感不妥，發文大呻：「小弟見識少，第一次見人帶手套包壽司」。並在帖文留言中表示：「壽司本身不應該帶手套做」，覺得戴手套造壽司不夠專業，皆因米粒不單會黏在手套上，雙手因隔著手套而不夠敏感，握出來的壽司飯會鬆散：「壽司米會黐住手套，師傅亦感覺唔到米粒鬆緊，即使呢度啲壽司飯係機做，但係好鬆散，難用筷子夾起。」樓主覺得該店人均消費為$300，手法應更專業：「如果係『爭鮮』我唔會覺得奇怪，不過呢度成差唔多$300一個人，唔應該係咁。」

網民狠批樓主「西客」

帖文引來大量網民留言，不過似乎大家都不大同意樓主的說法，反駁其實有不黐飯的手套：「有壽司專用手套唔會黐住飯㗎，好多外賣店同放題店都會帶啦！」而且覺得就算人均消費$300也不算好貴：「300蚊好貴咩？？？？」不少人覺得戴手套根本無問題，一點也不出奇：「有乜問題」、「都係乾淨衛生啲啫，你話佢擔住口煙就值得討論啦」、「戴手套握壽司有幾奇？戴安全套握壽司就真係值得出個post討論下」。

網民反而覺得樓主是「西客」：「香港通稱『西客』」，而且「你講得啱頭5個字」的留言竟然比原帖的like數更多，意指樓主真的見識少，狠批：「睇完樓主 message， 終於知道香港點解咁多麻煩人」、「放鬆啲啦香港人，戴手套又話唔傳統，無戴一陣又有人出嚟話衛生問題，唔好再做西客喇，人哋戴手套都要阿吱阿咗，唔通你覺得唔戴手套會好食好多? 冇人挾持你入去食家ma」。

戴vs唔戴，戴左都未必衛生？！

不少網民都為師傅感到無奈，覺得師傅「戴又死唔戴又死」，無論怎樣都會有人挑剔：「唔戴手套又會走另一條麻煩 L 出嚟話佢唔戴手套」。大多數人都覺得戴手套會衛生點，尤其是這種平民壽司店：「我自己覺得高檔壽司當然唔應該帶手套，但呢類走大眾路線就應該帶。」更有人上載了一張脫皮乾燥的手，留言：「我唔帶手套包壽司既話！您夠唔夠膽食（我唔係做飲食業）」筆者看到都心慌慌！

不過又有人覺得戴手套有機會更不衛生，唔係呀嘛？！原因在於「戴手套仲唔衛生，師傅唔會好敏感咁feel到隻手有無污糟野，戴手套都會少左洗手戴住周圍掂再去整壽司，件壽司食完真係延年益壽」、「唔用手套起碼會有個意識要洗手，用咗手套係洗手嘅意識都無，因為根本唔覺隻手污糟」不過有網民突破盲點，覺得衛生與否在於師傅個人的衛生意識：「唔帶手套就唔會摸其他嘢？要亂摸嘢冇衛生本身係人嘅問題，係都要賴手套，不如賴安全套啦」。

網民：咁嘅價錢，要求唔好咁高啦！

網民就覺得相片中的壽司店其實都很大路，價錢平民化，樓主要求無謂咁高：「食鮮選都咁高要求？」、「對人有要求既時候，望下自己比緊幾錢食一碟壽司先啦」不要以為自己身處日本壽司店，或是在吃高檔的Omakase：「你估真係日本匠人整比你食咩」、「小弟見識少，第一次見人食Donki但以為自己去左Omakase。發現於香港壽司刺身關注組」、「屌唔講以為邊間omakase十幾廿蚊一碟貨仔」。