黃傑龍不滿廖孖記第四代傳人做法 發文怒斥「做生意要講誠信 」獲網民大讚

相關閱讀：

廖孖記第四代傳人上電台節目爆料4大重點：30年前已外購白腐乳再加工

廖孖記結業｜廖晃業三鞠躬感謝顧客 回應客人退貨不果：大家應該全部食晒

黃傑龍怒斥廖孖記無誠信

近日，敘福樓的主席兼行政總裁黃傑龍在社交媒體上發表了一篇文章，他提到「聽咗訪問，食安嗰部份放埋一邊唔講住，對於做生意講誠信呢一點有嘢想講」。他舉列指出，如果他的餐廳「挽肉と米」有一天決定使用深圳的現成漢堡扒，他會事先告知顧客，「絕對冇可能詐詐諦諦，靜靜雞換咗唔話俾人聽，繼續收人咁多錢」。

是否淨係老字號需要咁呢，唔關事嘅，所有商業活動都係誠信行先，好似我最近IFC 開嗰間挽肉と米，跟足日本社長嘅要求喺現場每日用日本牛肉新鮮製造漢堡牛肉，所以喺現場做咗個10度嘅玻璃冷凍房，就係為咗俾人客睇到。既然係公開講咗承諾咗，就當然係一直會咁做，如果有一天我哋變成喺深圳搵一啲現成嘅漢堡扒嚟賣，為咗控制成本，我都一定事先會同大家講，絕對冇可能詐詐諦諦靜靜雞換咗唔話俾人聽繼續收人咁多錢。當然，我亦都冇咁蠢會走去咁樣做，因為我爸爸17年前已經好認真咁教咗我做生意講誠信呢個終極道理。

黃傑龍分享接手敘福樓心得 父親嚴厲堅拒用點心供應商

黃傑龍也在帖文中分享了他17年前接手敘福樓時的經歷。當時，他面對的是5間虧損的餐廳，他決定進行一系列改革，包括考慮使用中央工場和OEM生產點心和湯品。

17年前我接手敘福樓嘅時候，當時只係得五間基本上係蝕本嘅屋村酒樓，經營嘅方式在當時看來也算相當傳統，特別是包括所有點心每日由師傅新鮮現場摙出嚟，所有上湯都係現場由師傅熬出嚟。當時作為一個工程師、工商管理碩士學位嘅我，其中一樣必定要面對嘅就係如何改革，當時整個餐飲業都開始講中央工場，OEM買現成點心、包裝上湯。

然而，當一位供應商向他們提出合作時，黃傑龍的父視見到這位「好多香港大集團」都用的供應商後，堅決反對，並教導黃傑龍「試下都唔準，行入嚟門口都唔準，俾人見到佢行入嚟人哋都以為我哋用呢啲嘅嘢！」這段經歷讓黃傑龍深刻體會到誠信的重要性。

當年我爸爸仲唔算太老只係60幾，都仲係每日返酒樓嘅，佢見到呢個人走咗之後就走來問我係咩人，我如實話俾佢聽。然後佢塊面黑晒，從來喺工作上冇咁惡鬧過我，我到而家都好深刻，佢話：「以後唔准佢再入我哋公司門口！」我見佢咁嬲都好愕然，回答咗一句「我唔係要用，試吓啫，都要知道下個社會嘅變化」佢仲惡：「試吓都唔准，行入嚟門口都唔准，俾人見到佢行入嚟人哋都以為我哋用呢啲咁嘅嘢！」呢件事我好深刻，從此之後我冇再見呢個人，通過呢件事我亦都從我父親嘅身教之中學識咗，我哋敘福樓係要貨真價實嘅，有啲嘢係會貴啲成本，有啲嘢係比較效率低，但係更加重要嘅係保留某一啲價值觀。當然童話故事唔係永遠只有完美結局，一直堅持人手做唔代表生意好，所以後來大家都知所有敘福樓都結業，但係到結業之前最後嗰一日，我哋所有點心、上湯都仲係現場造。就算今日仲係營業中嘅天水圍煲仔王，都仲係所有點心現場做。

黃傑龍堅持原則至終

黃傑龍強調，即使敘福樓最終因堅持手工製作而結業，他們在最後一天依然保持了傳統的製作方式。他認為，維持誠信和傳統價值觀比短期的經濟效益更為重要。他用自己的經歷來反思，如果一個企業的核心生產過程已經改變，應該坦誠地告知消費者，讓他們自行決定是否繼續支持。

我係想表達，如果30年前某一個生產腐乳重要過程已經變咗唔係自己做，咁之後你啲宣傳、訪問、點可以繼續講返真嘅一樣現場做？ 如果因為某啲社會嘅原因或者法例嘅原因某一種工序已經唔可以再喺香港造，只能夠坦誠同消費者講，係唔係繼續買係消費者嘅決定。