茶餐廳農曆新年提早加收一二 網民：你唔好中秋開始收！
廣告
新年期間不少餐廳都會加收額外費用，通常都會加收一二，以慰勞新春期間仍然開店，提供美食給我們。不過昨日就有網民上載一張圖片，分享自己發現一間茶餐廳竟然由年廿四就開始收取新年附加服務費？
茶記年廿四開始收附加費？
昨日有港男在一間餐廳發現1張通告，上面寫上「農曆年前後，即年廿四至年初九，各項食品及飲品加至壹至貳元，多謝各位貴客惠顧。」，不禁大感憤怒，並指香港餐廳只識搶錢，又問港人北上怪得邊個？
網民直斥：咁大個人第一次聽！
有不少網民留言表示新年期間加收很正常，但年廿四就開始實在太誇張，「年廿四已經開始收貴D, 咁大個人真係第一次聽」、「初一至初四出多d糧俾伙記，我理解，年廿四就來我真係得啖笑」、「睇見就唔會幫襯咯。北上消費好過益呢類商家」，有網民更譏諷「喂！佢唔中秋節開始加已經好善良」，大讚老闆已經收得算遲了。
相反意見：加一兩蚊都嘈，大家乞兒黎？
雖則老闆由年廿四就開始收新年附加費，但也有一班網民認為一至兩蚊濕濕碎，「加一兩蚊，唔係十至廿蚊wo ? 唔係新年都加得啦？」、「新年流流，請人都要出多啲錢啦，加果一兩蚊係度嘈」、「大時大節員工返工都有機會工半至雙工，+一兩蚊好小事」、「廿四至初九，機票加左萬幾」，發文的港男就回覆留言稱「孤寒果1-2蚊係我呢d窮L錯…」
港男樓主盞鬼回應
事發的帖文，亦不時可見發文港男的盞鬼回應，有網民嬲嬲指這段時間又不是業主可以突然加租，不明白餐廳為何要突然加價，獲樓主回應暗示老闆買了上周至今話題熱爆全港的邁阿密對港聯足球賽門票；有網民問港男「你自己唔加人工嘅？」，樓主則串爆回覆「你年廿四就收雙工嗎？」不過，帖文不久就未知原因已經被刪除，但有餐廳年廿四開始加收附加費則仍然存在。
圖片來源：Facebook@香港茶餐廳及美食關注組
