英國即食麵中伏分享！移英港人列出3大伏位 出前一丁都炒車？｜飲食熱話

英國即食麵伏味濃？

移英港人試伏器實評：即食麵唔掂！杯麵食一啖即掉

香港人向來識飲識食，就算簡單一個即食麵，對其麵質、湯頭，味道都有要求。最近有網民在一個移英港人FB群組「香港人在英國煮出好味道」帖文討論當地即食麵質素，引來不少網民分享中伏經歷。有網民指自己到埗後化身「試伏器」一個月，結論是「平價到貴價杯麵都唔掂」。不少網民狠批老外即食麵「無邊款唔伏」，杯麵更「食第一啖即掉」，更有網民指十多年一款即食麵令其畢生難忘，「依家喺超市見到都驚」。

3大騎呢伏位：杯麵似糊仔、黃薑粉做湯底？

綜合網民意見，在英國買到的老外即食麵普遍都不合胃口，3大伏位包括：麵質偏腍不彈牙、吸湯後變BB糊仔和味道古怪。例如，出前一丁歐洲版盡管湯底不過不失，卻因麵質一pat pat 而「炒車」，另外Pot Noodle更被狠批「難食過狗屎」。這個狂吸負評的品牌是英國45年老字號，款式多又符合當地人口味，加上售價相宜，確實是入門首選，沒想到卻是不少港人的「中伏」回憶。

除了麵質，作為即食麵靈魂的湯底都令人食到懷疑人生，有網民分享，多次買即食麵，湯底都是黃薑粉味，也有湯底「唔知想扮咩味」，看來網民都食到好迷惘。

移英港人解密：識食梗係食印度即食麵！

老外口味即食麵不合胃口也絶非冇得揀，網民真心分享多款「無伏即食麵」，大都來自日韓台，不但合口味而且選擇多，可以日日食而不會重覆。另外，有網民大力推薦印度超市的咖喱即食麵好食高質。看來只要識揀，英國即食麵都有好選擇。