港男街市買肥牛 浸水解凍清水變紅色！食安中心3招正確解凍法｜飲食熱話

港男慈雲山街市買肥牛 浸水解凍嚇見甩色變白

有網友於Facebook「黃大仙區友」討論區中出帖發文，表示自己在慈雲山中心街市購入安格斯肥牛片，準備解凍食用時「浸咗15分鐘，嗰啲唔係血水，好似係紅藥水，啲肉就好似漂白晒，唔怪得之啲肉咁紅咁靚，原來係加咗人工色素，大家以後食之前要睇清楚洗乾淨」，有圖有真相，事主將肥牛浸水前後色澤圖文並茂對比，浸牛肉的水呈血紅色，而肉片則慘白如豬肉，故他嚴正其詞地質疑牛肉加了人工色素而令到肉色鮮紅。

事主圍爐不成 反被網民嘲無知

帖文一出即引起大批網民留言，大大力嘲笑事主無知：「樓主第一日入廚要加油」，出血水甩色的主因與他錯誤的解凍方法有關，「肥牛片唔洗浸架喎」、「牛肉浸完變豬肉，不過牛肉係唔應該浸水嘅，牛扒肥牛都唔使洗㗎」、「肥牛片基本上一解凍即刻落鑊就可以食，無需要做任何事前工夫」、「如果一個人失血過多，相信面色都會變白……」。有好心網友則表示「用凍水浸出嚟嘅係紅色嘅，估計都只係肉類本身嘅肌紅蛋白，所以啲肉最多只可以話佢唔係新鮮，因為接觸咗空氣一段時間變紅咗。」而並非樓主所言的加了人工色素。

防細菌滋生食安中心教路3大解凍方法

知識決定命運，大家不妨參考食安中心建議的解凍方法。不論是生吃或需要烹煮的食物都應讓食物保持在低温狀態以防細菌滋生，該中心建議消費者可以雪櫃、流動自來水及微波爐來解凍食物，當中雪櫃來解凍食物時間較長，但效果最佳。

雪櫃解凍：食物用保鮮紙包好，並在兩天內處理或食用。

流動自來水解凍：自來水應保持流動， 以縮短解凍食物所需時間，即食食物須用保鮮紙包好，才可用自來水解凍。

微波爐解凍：食物放進微波爐前須用保鮮紙包好。解凍分兩次完成； 完成第一次解凍後 ， 應取出食物翻動 ， 然後再完成第二次解凍，使解凍效果更全面。已解凍食物有部分的溫度可能超過攝氏30度，細菌容易滋生，因此須馬上烹煮或食用。