香港火鍋店3大離譜規矩：落單要隔2分鐘 每次10件　網民齊怒斥

3大點餐限制

事主指自己到大角咀台式任食邊爐用餐，直斥餐廳「諗埋晒啲縮數」、「任食火鍋都要聖人模式」。 3 大賤招包括任食兩小時、1小時30分就要 Last Order，而1小時30分鐘內，每次落單居然要隔 2 分鐘！事主計算過後，1小時30分鐘只可以落45次單，而最誇張的是每次訂單限制為10項，所謂一項，蜆、蜂巢豆腐、海斑片、響鈴一件就為一項，肉正常一點，一碟3-4片為一項，結果事主5人用餐，叫「五隻蜆，五嚿魚﹐就已是十個item」，又要再等2分鐘才可下單。

用餐體驗超差　一直狂等2分鐘

事主直指今次的火鍋體驗非常差，指自己雖然可以食飽，但成餐飯都「窒住窒住呢下嬲呀嘛。」，她解釋「其實飽嘅。因為通常呢啲火鍋都會有啲位俾你自己夾菜夾丸，仲有啲粥粉麵飯。」，直指「問題係感覺真係好差，想一次過點晒啲嘢都唔得，落下單又要停，跟住心掛掛2分鐘之後又要去落單，成餐飯都係咁。」，希望一眾網民不要中伏。

網民坦言：唔好怪人去深圳

對於這種點餐模式，一眾網民都感到不滿，直指店家小器，又認為對方可能已違反「商品說明條例」。

• 「不如整埋要睇完廣告先可以落order」
• 「其實佢係咪已經違反咗商品說明條例，本身限時任食 2 個鐘，佢限時之外自己再強加限次。即係你可以食幾多係計到，技術上唔可能叫任食，開名好喎！」
• 「其實呢個點餐模式都搞到人好大壓力，成日要望住個timer睇下夠鐘點得未」
• 「明明打90分鐘生死時速都變慢步人生路」
• 「之前有食過一啲系統係有冷卻時間，但係只係針對一部機，即係你一臺有10個人，可以10個人一齊柯打」。