港男旺角食米線被店員要求食快啲「你剩番4分鐘食！」網民竟撐餐廳
港男旺角食米線被趕 店員：「你剩番4分鐘食！」
食客被店員無禮對待，自然谷氣。近日就有港男在Facebook群組「香港米線關注組」大呻被食店趕走的經過。話說事主於晚上8時41分入座，店員在9時要求先賣單，9時26分便走來催促事主，指著他道：「你剩番4分鐘食」。
- 事主發文：「20：41 坐低叫嘢食。21：00 比錢先，要埋數 （當然冇問題）。21：26 有位同事行來抹怡，員工：你有4分鐘食。食客（我）：吓 ？（堅疑惑，唔肯定自己聽到咩）。員工：你剩番4分鐘食（舉起手指一指我，再舉4隻手指，再去指一指碗得番1啖的米線）。食客（我）：咁我係要立即放低筷子？ 員工：咁洗 。21：28 起身離開。」
事主有感被無禮對待
事主形容店員趕收工：「佢地真係好趕，飲完豆漿支飲桶離開個咀唇冇1cm，已經行埋來收走個杯。」他不滿店員的態度，覺得應好言相向，不應手指指：「我明白唔係食緊什麼高級餐廳，都明白或者超時 OT 冇補，但講一句“我地店鋪收930，仲有4分鐘要關門” 真係咁難嗎？同埋講野有必要手指指？」
店員應一早明言收工時間，事主才有心理準備：「又或者入來時講一講 930 要準時落閘，你ok就食，唔得就走，真係唔得？新開張，都咁樣….」最後提到：「利申我食唔到熱野（熱小小都會生飛滋），但係我好喜歡食米線。百無禁忌，咩叫剩番4分鐘食……」
網民力撐餐廳，怒斥：「西客！」
事主想圍爐取暖，怎料大批網民竟力撐餐廳，反而覺得是事主問題，食得慢阻人收工，直言：「阻人收工猶如殺人父母呢個道理咁都唔明？」、「阻人收工，抵比人….」不明白為什麼要用45分鐘食一個麵：「食咗差唔多45分鐘，碗米線都仲係熱到要慢慢食？我又想知如果人哋唔出聲趕你，你會諗住食碗嘢食幾耐？」、「9個字都唔夠你食？？」
吃不慣熱食不是藉口：「食啲咩會仲好熱，我諗唔明，睇你前面啲句子覺得你份人冇乜嘢，睇你後面打你唔食得熱嘢，我眼都突埋，食咗九個字，碗米線仲係熱嘅咩？不知所謂」。而且其實員工已暗示就快收工：「你明知人埋數，姐係代表人地就收工，你明知自己食唔到熱野，會食得慢，點解唔外賣？或姐食其他鋪頭？」阻人收工罪大惡極，手指指已算禮貌：「2100叫埋數即係好婉轉咁同你講要收檔，仲好意思坐多半個鐘，似樓主申請比人x多d，個員工只係手指指已經好有禮貌。」直斥事主是西客：「西客，完。」、「麻L煩客人」。
平反聲音：「店員應明言收工時間」
不過亦有少數聲音為事主平反，覺得店員態度確是有問題：「點解d comments咁搞笑，唔好阻人收工我明白，但係依家問題係d員工用咁既態度去叫人走wor，搞到好似喺營業時間最後一個鐘去食嘢就係罪犯滔天咁。 如果員工係好聲好氣同個客講: 唔好意思啊，我哋準備收工啊。 我相信樓主唔會咁嬲。」、「好多人都係服務員，現實冇得惡，只有做同唔做，咪係度發窮惡lor」。
不會俾面店員：「佢咁x串，我會一x掃曬嘢落地，同佢講：吾使四分鐘，我即刻就走」、「我會㗎，咁x串，同佢講，你依家得返四分鐘執」。店員應明言收工時間：「當你碗野50分到，講句我地收9:30，我會9:25分前走，唔會阻你收工」，亦好奇趕收工為何要入客：「點解仲要入客？！呢個好大問題。」甚至有人覺得香港香港飲食業就是態度差：「香港飲食業，係咁上下:( 無乜必要都唔會再出去食」。
