Afteryou＋NUMSO Dessert泰國軟麵包 10多種口味兩種食法：泰式奶茶＋斑蘭＋人氣榴槤芝士蛋糕 ｜新品速遞
廣告
泰國軟麵包是曼谷街頭必吃小食，夾著不同餡料的Soft Bun食法也有很多種。今次記者在香港搜羅到Afteryou及NUMSO Dessert兩款牌子的冷凍軟麵包，餡料口味共有10多種！記者仲會親試人氣榴槤芝士蛋糕，即睇試食報告及售賣地址啦！
撰文、攝影：艾菲
泰國Afteryou冷凍軟麵包人氣IG爆紅甜品
日東卷蛋已經食厭？近日記者發現香港有售泰國冷凍軟麵包，口味款式比得上日東卷蛋！碳燒軟麵包於泰國街頭一直十分有名氣，而人氣連鎖甜品店Afteryou推軟麵包冷凍食法後大獲好評，引起一陣熱潮。今次記者在香港一間泰國食品專門店搜羅到由After you及NUMSO Dessert出品的軟麵包，為大家率先試食！
軟麵包口味10多款 內藏2個食法
2個牌子的軟麵包口味合共13款，包括泰式奶茶、泰式斑蘭味、三重爆芝味、牛乳味等，鹹甜皆有，其中傳統泰式斑蘭味及牛乳味最為出色，兩者食落不會過甜，而且味道最為突出。而冷凍軟麵包共有兩種食法，兩種口感各不同：
一）攝氏4度 口感輕軟Creamy
軟麵包放在雪櫃中售賣，買回家後，也記得要放入雪櫃保存，吃前才放在室溫中。麵包吃落質地鬆軟，好像棉花般入口即溶，內餡呈現流心忌廉狀，感覺像是超多餡的忌廉Bun。
二）冰格儲存 呈現雪糕狀
如果把軟麵包放在冰格，除了可以延長食用期外，同時可以做成不同口感。食前從冰格取出，在室溫放置約5分鐘，麵包質地較結實，內餡為雪糕狀。
此味道沿用第二種食法，麵包內的餡料為雪糕狀，包身及餡料都用上北海道牛乳，味道與麵包超夾！大推！
其他七彩麵包 逐款試！
泰式奶茶讓人感覺會特別甜，不過此款食落茶味較輕。
表面灑上濃濃的朱古力粉，餡內的香蕉味較朱古力味重。
表面冰凍後似雪條外層的脆皮，Nutella醬超濃，整體感覺偏甜。
士多啤梨味不算太過突出，不過配搭表面糖份，味道還是不錯的！
甜味較多，阿華田味較淡，是當中較失望的一款。
不論表面及麵包都極濃味，雪硬了的表面食落有層次感。
唯一一款鹹味軟麵包，表面灑上芝士絲，最驚喜是內裡用上的芝士較濃味，不建議芝士味放入冰格內，不然芝士餡會結冰，食落有點古怪。
同場加映！人氣爆燈榴槤芝士蛋糕
來到榴槤季節，身為泰國食品專門店當然有售榴槤產品！近年在網上瘋轉多款榴槤芝士蛋糕，今次記者試食曼谷隱世甜點店「怪獸甜品」推出的榴槤芝士蛋糕。蛋糕用上原件金枕頭榴槤肉，再加上低脂低卡芝士蛋糕底及自家烘焙曲奇餅底。三層配搭一個人食完整個亦沒有難度！
這款榴香芝士蛋糕是由怪獸甜點店KANOMKANOM泰國直送。
