快餐店1人霸位奇招 網民熱議大家樂一人獨食 用支筆霸位咩道理？｜飲食熱話
廣告
繁忙時間，快餐店人頭湧湧，座無虛席，一條友食飯究竟應該點霸位？還是應該取餐後再搵位？相信不少人都遇到以上情況，近日就有網民在Facebook群組「真.屯門友」中熱烈討論，網民提到去大家樂買飯，見一食客以一支筆來霸位，對該食客行為感到不屑，嘲諷該霸位食客：「你用支筆霸位？」此留言引起網民熱議，有人讚同樓主所見，有人則覺得霸位人士情有可原，實屬情理之內。大家又點睇呢？
大家樂食飯 用一支筆霸位遭嘲諷
一個人在繁忙時間在快餐店進餐，又要點餐又要搵位，究竟可以點？近日有網民在Facebook群組「真.屯門友」中留言，提到在大家樂買飯時看見有食客以筆霸位，對此大感不屑：「話說頭先去大家樂買飯。見到有個食客會用支筆黎霸位。然後走咗去買嘢食。佢返嚟我就話佢你用支筆霸位？」而且覺得自己下次可以再過份點，不應手軟，更狠斥該霸位食客為「x街」：「諗返轉頭，我下次應該玩嘢少少，攞住支筆去同經理講：（有人留咗支筆）等個仆街搵唔番支筆！」
「一條友食嘢可以點」vs「點解唔可以買完搵位？」
雖然只是一個普通留言，卻引來不少網民回應，並就事件作出一番辯論，有人同意樓主所見，更嘲諷霸位食客：「睇開d啦人地身無長物」但有人覺得一個人無朋友同行，無人幫手霸位，取餐後想搭枱又有機會遭拒，有時都真的好無奈，才會出此下策，實屬情理之內：「好多時一條友都好難搵位，有時問人可唔可以坐，係都話有人坐唔想人搭枱」有人覺得用筆霸位其實都不離譜，有時一支公食飯，身上可能只得銀包：「一個人想堂食，拎餐唔通真係迫人用銀包霸位？」
但有人反駁何不取餐後才搵位：「一個人想堂食，點解唔可以買完搵位？」、「正常唔係買完野再揾位？」隨即有人回應，有時真的無可奈何，繁忙時間分分鐘要等上15至30分鐘，難道要捧著餐呆等？「屋邨舖真係可以15-30分鐘都等唔到位」，「雖然筆又難搞啲，不過一條友食野可以點？要人買完野食拎住個餐先周圍搵位咩？」
更有網民分享其激心霸位經驗，曾以手袋霸位卻遭人嘲笑戲弄：「我曾經用過手袋霸位，取銀包去買嘢食，點知回來。。。個手袋俾人拎左去隔兩個位，有一男一女他們坐了我的位，過係咁對嘲笑。唉。。。。。香港有呢種人，以強凌弱。唔會有運行啦」
關鍵詞
飲食熱話
圖片來源：《愛回家》劇照、Facebook@「真.屯門友」
