連登力數太安樓掃街3宗罪！狠評人氣名店難食＋衛生差過垃圾站｜飲食熱話

Dec 29 2022

連登仔大數太安樓掃街中伏3宗罪，狠評難食黑店、衛生差臭過垃圾站！提起港島區熱門掃街勝地，首選一定是西灣河的太安樓。不過近日有連登仔在討論區以「掃街嚟講，太安樓都算係全港最垃圾」為題發帖，大數太安樓通風差、環境衛生烏煙瘴氣，狠評「仲去太安樓食嘢啲人食開屎」，帖文一出即引起正反兩極意見熱烈討論，有人狠評太安樓衛生差臭過垃圾站，力數太安樓掃街中伏3宗罪，也有街坊力撐太安樓掃街小食美而廉，大家又點睇？

連登仔力數太安樓掃街中伏3宗罪

太安樓一向被視為港島區的掃街美食大堂，意想不到竟有連登仔在討論區以「掃街嚟講，太安樓都算係全港最垃圾」為題，直斥太安樓「成個場烏煙瘴氣，通風又差，地下黐𥹉𥹉，無一間嘢叫好食，夜少少近馬路又多老鼠，仲去太安樓食嘢啲人食開屎」，斗膽挑戰一眾太安樓是美食天堂的支持者。帖文一出旋即引起熱烈討論，大家都指稱「好X臭個場、冷氣都冇」、「食完肚痛」、「勁X唔抵食」、「成個場普遍嚟講真係難食居多」，綜合一眾在太安樓掃街中伏者的慘痛經歷，得出太安樓成「全港最垃圾」掃街場的3宗罪。

太安樓第1宗罪：通風差、無冷氣

不少網友批評太安樓通風差、無冷氣，「個場成日都有陣『叔』味、最大個間炸嘢舖，睇住佢跌落地沖沖水再賣」、「烏煙瘴氣，臭到X街，入去幾分鐘，之後行返出嚟成身油煙味」、「臭過垃圾站」、「冇冷氣令你覺得熱同黐𣲷𣲷」。

太安樓第2宗罪：老鼠橫行、衛生烏煙瘴氣

承如樓主所說「夜少少近馬路又多老鼠」，不少網友分享自己親身經歷，「太安樓個公廁好似時光倒流咗50年咁」、「幾年前老婆食完鹵水野就肚疴，訓咗兩日院」、「有次係太安樓食完碗雲吞麵之後半粒鐘唔夠就肚痛，真係乾淨到呢」、「個場應該成30年冇大清潔同維修過」，太安樓的衛生環境烏煙瘴氣為人詬病。

有網友指曾目擊在太安樓內「最大個間炸嘢舖，睇住佢跌落地沖沖水再賣」，相當噁心。（圖片來源：LIHKG討論區截圖）

太安樓第3宗罪：質素明顯下降、價錢貴性價比低

而最令網友失望的是太安樓的食物質素明顯下降，「未咁出名之前算平又好食，出左之後啲質素明顯下降左唔少，仲要睇住佢加價加到double」、「個海南雞飯伏到仆街」、「魚蛋佬啲魚蛋都叫好食？以前最多叫平，是但去間有魚蛋賣都唔會差過佢」、「魚蛋佬自從唔係伯伯之後，無咗啲萬年混醬就唔好食」、「舊泰國嘢執左咗，變咗啲懶新式fusion嘢，貴左勁多，無食過」、「講平？新入場啲食店一啲都唔平，有啲仲要無位企係到食」，價錢貴性價比低是太安樓被網友摒棄的致命傷。

有網友投訴在太安樓食到兩間黑店，寧願返北角和鰂魚涌吃好了。（圖片來源：LIHKG討論區截圖）

網民：太安樓是港島唯一掃街去處

不少住港島的街坊老實說太安樓是港島唯一掃街去處，「唔通住港島又搭幾廿蚊過海篤串魚蛋咩」、「掃街咪又係貪方便」、「夜媽媽唔使過海仲有十檔八檔做生意仲想點」，住在港島的街坊夜晚想食宵夜，太安樓是不二之選。亦有網友大方分享太安樓內優質的美食之選，「我覺得好食嘅有章魚無雙、八一蛋包、一豚、林記車仔麵」、「魚蛋佬啲咖哩汁勁正」、「太安樓只食林記車仔麵」、「晚晚排到X街炒麵舖」、「有間印尼串燒幾正」。口味這回事各有喜好，大家又覺得太安樓值不值得去呢？