$1,200乳豬到會套餐竟「無乳豬」網民怒轟店家呃錢搵笨｜飲食熱話
廣告
新年不少人都會食乳豬，夠晒紅卜卜，好意頭又有氣氛！不過有網民就發現有人氣食店推出「乳豬到會套餐」，當中居然沒有包含乳豬，若要食乳豬需要另外付錢加購，不少網民都狠批「呃錢」、「揾笨」！
$1,200新年乳豬到會套餐竟「無乳豬」？
每次節日聚會或與朋友開party時，大家都會選擇叫到會，方便之餘又美味，加上食物種類多，一班人就最啱！最近新年將至，各大餐廳都相繼推出新年優惠應節，但有間人氣食店「友利冰室 勿當奴」就被網民發現指其價值$1,200起的「6-8人乳豬到會套餐」，包括2份主菜、1份前菜或沙律、2份飯或意粉、2份小食、6杯飲品，以及甜品日本泡芙。但眼利網民驚揭主菜有6款可選，另有6款就要另外加購，當中「招牌脆皮乳豬 足3KG越南乳豬」正正就是其一，需加$480！
不過後來記者去官網查證，發現「6-8人乳豬到會套餐」已刪去「乳豬」一詞，改名為「ＸＸ招牌到會套餐」，未知是受心虛或受到網民熱議才有如此舉動！
網民炮轟：「呃錢又搵笨」
對於套餐「乳豬套餐沒有乳豬」，實物與描述不符一事，大部分網民都覺得非常離譜，更炮轟店舖「呃錢又搵笨」、「乳豬餐係指個客好似豬仔咁俾佢劏」、「樣樣都要加錢，個價搵笨柒」。更有人嬲爆表示店舖違反商品說明條例，揚言應該要去報海關！另有部分網民投訴套餐價錢昂貴，有上年已幫襯過的網民就指出「上年年頭算抵食㗎，加埋錢千一蚊有乳豬，兩主食，兩飯/意粉，兩小食，甜品嘢飲，由復活節開始加返哂價」、「隔咗一年，貴左$600，仲少個主食」。
另有網民就替食店反駁指「間舖燈油火蠟唔使錢啊？」、「老細都要交租」，也有食客表示「6大人幾細路都仲有食淨，我估佢夠8大人食，千幾蚊唔貴喇」。
資料來源：連登討論區
圖片來源：新假期編輯部、連登討論區截圖、TVB《愛回家之開心速遞》截圖、《孤獨的美食家》截圖
