半價買電器！原來買電器有價講？用盡信用卡回贈+商場著數@優惠黑客專欄｜購物優惠情報

Oct 5 2020

購買電器動輒要數千元，但有時冷氣壞了又真係唔換唔得；今期就教大家3個串燒優惠，讓大家添置或更換家居電器都可以隨心所欲，唔再怕價錢貴，話買就買！

撰文：優惠黑客｜圖片來源：相關機構

學識以下3個方法
最平半價入手電器

01｜商店優惠

要買到平靚正產品當然要貨比三家，很多人都知小店買電器價錢會較平，但其實大形連鎖店長年都有做特價；即使特價後仍比小店貴，但又送禮物，又可儲積分，其實除笨有精。而很多朋友都未必知道，其實大型連鎖店的家居電器係「有價講」嘅！

只要你找到其他店的價錢，不妨跟Sales講，問佢可唔可以做到低價。筆者曾經購買洗衣機，小店$3,700，連鎖店要$4,200，雖然會加送個$300電熱水煲，但依然比小店貴，於是筆者將實情告知店員，店員然後問問經理，結果$3,800買到，電熱水煲照送，最後還送多張$50雪糕券！

筆者因為健談，在幾間大型連鎖店都結交了朋友，得知電器即使有公價，其實都有大概5%可以調節，又或者可以多送禮物。大家亦千萬不要以為同一連鎖品牌的所有分店都係同一個價，如果你去一些競爭比較激烈的店，例如同一個商場同一層，又有百老匯，又有豐澤，又有蘇寧同中原電器，一般都會易啲講價。

02｜信用咭優惠

一年十二個月，基本上有十個月你都會見大形連鎖店和不同信用咭做推廣優惠，例如買到3,000元，信用咭公司便回饋$300。呢個優惠並非即時扣減，一般也是信用咭公司一兩月後以積分回饋形式放回你的信用咭戶口，所以大家除了享用了第一重商店優惠外，仲可以享用埋信用咭優惠，變左係額外優惠！筆者總結一下這個時段的優惠讓大家參考一下：

豐澤 – 用Citibank信用咭

優惠只限首30,000位已登記之主卡，推廣期: 2020年9月1日至10月31日：

HK$3,000回饋HK$100
HK$4,000回饋HK$180
HK$6,000回饋HK$250

百老滙 – 用任何銀行銀聯卡

推廣期由2020年9月1日至10月31日，購物滿港幣2,000元，即減$100。

蘇寧 – 用恒生信用咭

推廣期由2020年9月1日至10月31日，用恆生信用咭有以下優惠：

HK$3,000回饋HK$150
HK$5,000回饋HK$200 (流動支付再多$100)
HK$10,000回饋HK$300 (流動支付再多$100)

中原電器 – 用DBS信用咭

推廣期由2020年9月1日至10月31日，用 DBS 信用卡簽帳，滿HK$3,000回饋HK$150、HK$6,000回饋HK$350。

呢類信用咭回饋一般都屬額外性質，所以不影響你信用咭本身的簽帳積分。但筆者認為今期信用咭公司吝嗇了一點，過往很多次回饋都有10%，例如買$2,000回饋$200，買$3,000回饋$300，大家唔急的話不妨等下期優惠呢！

03｜商場優惠

很多大型連鎖店座落於商場，而商場為了吸引人流，很多都會推出商場消費優惠，例如抽獎活動、倍增商場積分、送小禮物等等！今期筆者會推介時代廣場，因為呢個商場大型連鎖店林立，而且近期優惠相當吸引：

每買$800送$150 (HK$50購物優惠券兩張及HK$50美食優惠券一張)
星期四 (公眾假期除外)更可享雙倍優惠券獎賞，即每$800，送$300！
每滿$5,000可同時額外換領HK$500優惠券2張 (周四雙倍)

註：推廣期至11月22日

商場送的優惠券本身目的鼓勵你再消費，所以一般買$100才可以用一張，而且最多只能用10張，但筆者認為若懂得用，這個優惠券很不錯，例如買新款波鞋一般都冇折扣，但依家就可以使用購物優惠券在Vans或Adidas享受折扣了！而美食優惠券筆者最愛在Lady M食個Tea，或者在Shake Shack外賣個Mango Shake + 芝士薯條。要知道在Lady M食個Cake 加杯野飲$70左右係幾咁爽呢！