美觀又實用！日本昭和懷舊迷你家電系列｜新品速遞

撰文：Si｜圖：Takara Tomyz、Instagram
昭和（1926-1989）是日本使用最長的年號，見證著日本的發展和興衰，人民生活、社會發展經歷重大改變。日本是世界電子業的先驅，其出產和設計的電器耐用、美觀，歷久不衰，如果你是懷舊愛好者，但空間有限，這套懷舊家電就啱晒你！

昭和電風扇

呢部座枱風扇嘅銀色金屬罩，仲有藍色扇葉，勾起咗幾多代人嘅回憶呢？就算屋企冇用過，睇電視電影都一定有見過。呢部迷你昭和風扇只有17cm高，擺喺書枱唔阻位，擺喺辦公桌就更加吸睛。

昭和Smart TV

呢部Smart TV連埋啡色懷舊電視櫃造型首先已經攞滿分，須配合手提電話使用，扭吓右下角嘅金色旋鈕，竟然可以轉台！如果閣下睇過「大牛龜」電視，一定試過訊號唔清而出現雪花，呢個時候你會點做呢？冇錯，就係狂拍電視機頂，估唔到呢個功能都加埋入去，勁過癮呀！

昭和黑膠唱機

講到懷舊電器，又點少得黑膠唱機？只要連上手機藍芽就變身成為懷舊喇叭，只要放下唱針，唱盤就會轉動，好似真係播緊黑膠咁。

昭和錄音收音機

聽cassette帶係好多人嘅青春回憶，想當年捕住電台錄低心愛偶像嘅歌、抄歌詞，錄低一餅精選歌嘅錄音帶送畀暗戀對象，絕對係以前青春電影嘅橋段。咪睇呢部錄音機細細部，只有一隻手掌咁大，但係有齊錄音、播音同收音機功能，一啲都唔兒戲㗎！