網上超市搶購潮！5大網購平台送貨額爆煲 要等半個月先收到貨 百佳/ 萬寧/ HKTVmall都有份

5大網購平台送貨額爆煲
要等半個月先收到貨 百佳/ 萬寧/ HKTVmall都有份

禁足令嘅謠言滿天飛，搞到大家都人心惶惶，即使政府未有確實安排，亦向傳媒一度透露若果實施禁足令，市民依然可以外出購買糧食同睇醫生，可惜未能安撫市民嘅搶購心態。不但實體店貨品被搶購一空，市民亦轉戰網店掃貨，但可惜有貨都未必送到你府上！事關送貨額爆滿搞到遲送或無發安排送貨。

1.百佳超級市場網店

記者於3月2日早上實試，百佳超級市場網店需要等大約1個多小時先可以進入網站！百佳網店公告指，未來12日嘅送貨日期已經滿額，新嘅送貨時間會喺翌日11時再更新，意味如果要喺百佳網店購物，同樣要等約半個月才收到貨！

當記者進入網站，選擇購物並安排送貨時，送貨時段顯示：「對不起，你所選擇地區（屯門區）送貨配額已滿，我們正盡力提供更多配額。請明天再次查看配額或選擇其他地區或送貨方法，不便之處，敬請原諒。」

2.惠康超級市場網店及Marketplace網店

跟住落嚟就試吓惠康網店app，一撳入去好開心見到24小時內送達嘅廣告，但碌落去選購貨品嘅時候就發現兩行細字，內容係話「由於訂單數量龐大，商品或有機會出現缺貨，送貨時間亦將稍為延遲。我們將於每日不同時段逐步增加更多送貨名額。不便之處，敬請原諒。」咦~無講明日子嘅？即係要等幾耐呢？

記者繼續購買去到訂單確認時，就彈岀「由於送貨配額已滿或店舖已過服務時間，我們暫時未能為你提供服務」，未能成功下單。再翻查官方網站，亦未有顯示目前物流情況，或最快幾時再安排送貨。

3. 連鎖個人護理品牌 萬寧

除咗大型超市嘅網店，記者又想親身驗證連鎖個人護理品牌萬寧，一入網站隨即就見到訂單安排嘅重要通告，通告內容提及訂單運送或取貨時間一般需要3至6個工作天，現需要額外1至2個工作天或以上。確實收貨嘅日子就需顧客留意電郵或短訊通知啦！當然亦可以按網站嘅連結了解詳情同最新消息。

詳情可查詢:
萬寧官方網頁:按此

4. 連鎖個人護理品牌屈臣氏

一撳入屈臣氏網站，就即刻彈出有關送貨最新消息，內容提及因應近日訂單眾多及人手短缺指定送貨限額已滿，請選用特快送或特快門店取貨。另外部份訂單的送貨日期將有可能延遲額外3個工作天或以上發貨。特快送需要訂單總額滿$399並於下午兩點前下單就可即日送貨，免運費。至於特快門店取貨就需要買滿$50並於超過160間門市取貨，最快兩小時內可取貨。

詳情可查詢:
屈臣氏官方網頁:按此

5.百貨店 HKTV mall

記者以屯門區地址在HKTV mall下單，系統顯示3月8號，下午6時後可以送貨上門，更有其他時間作選擇。雖然要等6日，但始終有勝於無。

記者同時有測試其他各區如元朗、將軍澳、港島等送貨上門嘅時間，需等候長達12至19日！即日下單最耐要超過半個月才收到貨！至於沙田區則顯示沒有可選擇嘅送貨時間，睇嚟沙田友門要選擇其他網購頻道。