JPEX案｜陳怡被轟潛水走佬 即現身拍片怒斥粉絲冚家剷：受死駱駝比馬大
陳怡拍片「丟」爆粉絲712秒：我而家係前所未有瞓得最好時候
陳怡於影片一開首便以「證明你D人得把口，叫我唔好咁Chur，要唞吓，到我休息就話我著草、潛逃」開場，指一眾粉絲眼見JPEX出事後，陳怡過得好、睡得好，妒忌心便會起。「搵到錢嘅時候你哋唔會講嘢，但我知㗎，你哋D人根本係小人，有『人』好差嘅特性，令到你哋人生都好差」，認為看到別人睡得好，有精神是「錯」，「人只係想身邊人永遠同自己同一個Level，你想睇身邊人死，人哋好少少你都唔鍾意」。
「錢又識係咁問我拎，無人關心過我情緒」
她又指知道有千千萬萬人想把她拉下來，早已見慣人性醜惡的一面，更有人在此時此刻叫她付74萬應急，令她相當勞氣。「有人叫我比74萬佢，又話有事又話剩，你哋無人關心我情緒，無關心我屋企被洗劫一切，淨係叫我課金。我以前課金，舖頭每人派3000蚊，現金又送過100萬，你哋好鍾意Email問我拎錢，成日話自己拎綜援，叫我送現金畀你，得個攞字。就算同我係男女朋友關係，你識咗我，都係我墊錢畀你」。數完一系列「好事」外，她再指「呢D嘢無人公開多謝我」。
陳怡：我前所未有瞓得咁好
至於她早前又話到日本玩，又被傳到英國生活，瘋狂被洗版問「點解可以瞓得著覺」，她即激動地指「點解我要瞓唔著，我問心無愧，我無做錯事，我瞓得好好，前所未有瞓得咁好」。更指人人發生事情就單單打打，豪言「你哋顧掂自己先啦，你哋唔正常呀，你哋好多人賺突晒，你地呢生人本來都唔會賺到咁多錢。受死的駱駝比馬大，我嚟緊會行運，仲有3，2個月就到」。她又重提被捕當日在拘留所瞓得特別好，「個女警知我好好瞓，個咀臉衰到，佢根本覺得有錢人入嚟就係要受罪」。
網民：好大粒花生笑到Gap gap聲
網民看到她的「自白片」後，即爆笑到不行，指「水已cap，關我鬼事」、「水咗佢班信徒咁多錢，食到個人腫到，緊係瞓得好」、「收晒數又走甩咗，爽到呢」、「怡姐袋住幾億，當然訓得好好喇」、「唔怪得水腫，推爆個filter都救唔到」、「怡姐心情好緊要過你哋班人嗰十零廿萬啦」、「佢真係short得幾盡，講到自己開OTC好似開善堂好大付出，最後好心冇好報然後XX全世界」、「老千唔通認自己係老千咩」。
