Edan的士事件1星期後的士Group先瘋傳　司機斥「奀星扮晒嘢」惹網民激戰

Jul 20 2023

的士司機的「專業」形象深入港人心，不少人都揚言「無特別事都唔會搭的士」，而早前Edan亦在Threads上苦呻自己搭的士的經歷，指司機明明聲稱8分鐘到，惟等了20分鐘對方仍未到，上車後更被司機埋怨塞車，令Edan大感無奈。此文一出，以為Edan呻完就完事，誰知近日帖文被的士司機行入瘋傳，更特意開帖文群起攻擊，斥Edan「唔係好大粒星㗎咩，咁勁無褓母車，要搭的士啊」。言論引起司機共鳴，而有人看不過眼為Edan討公道，誰知又被司機圍插，爭論相當激烈！

Edan早前呻搭的士被司機怪責　一星期後的士群組先瘋傳：咁都要批鬥？

Edan一向都會在網上分享生活大小事，早前曾分享自己搭的士的經歷，指Call車時明明對方指8分鐘到，惟等足20分鐘的士司機都無影，更沒有打電話通知他。等了20分鐘後，一上車就被司機埋怨塞車，指「唉，我都唔想蹝我時間⋯⋯真係嬲到震」。有感無奈的Edan當刻沒有出聲，僅在網上打了一句「師傅啊，善意提醒，你都蹝緊我時間，定你想我代D車塞住你條路同你道個靚歉？」原本打算網上呻一呻就算數，惟事件過了1星期後，事件才於的士群組瘋傳，由昨日起，Facebook群組「的士司機資訊網Taxi」中才有一眾的士司機即圍攻Edan，指「咁小事都要上網批鬥？」，更指「老老豆豆，呢D款落酒吧一地都係，明星都係好命啫，的士佬呻2句都要批鬥，使唔使啊？咁富貴咁小氣，有無考慮過人哋感受？」、「架車未到你點解唔Cut單？因為根本無街車啊嘛，你要等就等，唔要X就」、「講X到紅到去宇宙，保母車都無架，含啦」、「奀星搭的士，明星有公司車，又唔見姜B搭的士，收X啦」、「四圍都塞車，運輸署解決唔到塞車問題，呢D係政府問題，點解你要埋怨司機」、「嘥你時間咪唔好搭」。

網民護航：的士遲到唔使同個客講聲？

的士司機狂鬧Edan小氣兼無理，似乎忘記了事件重點是「Edan無啦啦受司機氣」，而有網民亦不忿群組內的無理留言，為Edan發聲，指「個司機知自己預測時間內唔可以去到個客到，都唔識打去講聲，死霸住張單，咁都話係個客錯，比個叻字比你；比預定時間遲足20分鐘，一定係個客唔啱啦，凌晨塞車喎，當然係個客錯」、「無品司機仲要話反個客轉頭」、「唔好話個客明唔明星，一個客人比司機咁樣對待唔通好合理？你當面比說話人聽就得，人哋上網講兩句話人批鬥，你哋班人咪又係呢度圍威喂」、「奀星？你睇佢Fans量先講啦，無腦」、「過咗咁耐先嚟講，可見你哋收料嘅速度同揸車一樣，咁Delay」。