Donki唔撐夜間經濟帶頭提早關門　呢間唔再捱通宵惹執笠傳聞：BYE-BYE！

Oct 13 2023

Don Don Donki眨眼之間已在香港開設9間分店，當中有2間分店24小時營業，而其他分店則大部分營業至凌晨1時，與早前政府推廣的夜間經濟可以說是「完美配合」。不過一直以來都未有特別更改營業時間的Donki，近日宣布其中一間分店決定不再「捱通宵」，有街坊大嘆可惜，但亦有人再指「執笠傳聞睇嚟係有可能發生」。

Donki唔撐夜間經濟提早關門　1分店唔再開到凌晨被指「等執笠」

Donki一向深受港人歡迎，不過自從開關後，有不少人都表示「要買就去日本買啦，匯率又抵，香港完全無減價」，更屢有傳出要縮小規模的傳聞。而近日在香港政府大推夜間經濟的同時，Donki突反其道而行，把位於小西灣藍灣廣場的分店營業時間，由「上午9時至凌晨1時」改為「上午9時至晚上11時」，足足提前兩小時關門。而官方在網上解釋指，此舉是為了「提供更佳的購物體驗」，並於10月9日開始實行。

donki 夜間經濟 — （圖片來源：Facebook@DON DON DONKI Hong Kong）

街坊表示「好失望」　網民：根本係執笠先兆

Donki提早關門，坊間正負評參半，有人留言指「好多人好夜先放工，原本可以買到嘢返去食吓，而家無得買⋯⋯點樣購物體驗？？」、「唔夠客就要面對現實啦」、「點解要響（喺）全港支持夜經濟歡呼聲中⋯⋯突然縮沙？個Tempo唔啱喎」、「慘，我經常晚上落去補飛」、「好失望，深夜係最舒服行Donki」。不過亦有人懷疑縮短營業時間「根本係執笠先兆」，指「張圖兩隻企鵝好似同大家Say Bye-Bye」、「就執先兆」、「就算佢唔執，佢間壽司店都好大機會執」、「夜晚去都係得小貓3，4隻，咁大間店真係開嚟無用」。而另有網民反指「如果縮短營業時間可以減低成本，不會導致執笠，好係好事，執咗對我哋居民無好處，少咗選擇，執咗又唔知要丟空幾耐才有人租」。

donki 夜間經濟有人懷疑縮短小西灣藍灣廣場分店營業時間等同「執笠預告」 — 有人懷疑縮短小西灣藍灣廣場分店營業時間等同「執笠預告」（圖片來源：dondondonki官網）

網民曾嫌棄Donki激安殿堂開太多　4間分店根本不應存在

其實Donki激安殿堂越開越多分店時，有不少港人只表示「開太多唔馨香，開關以後更加係任務完成」，更票選4間分店根本「多餘」，當中小西灣藍灣廣場分店亦早已榜上有名，被指「最應該執咗佢啦」，當時不少留言指「首先小西灣嗰間可以執啦，開咗Donki，商場都吸唔到人流，根本就無人去」、「個位咁X，點會有人去」、「小西灣個死場，開咗同無開無分別」。