15歲搭巴士付小童價稱「唔知喎」 司機狠狠教訓被惡媽怒轟 網民持對立意見
15歲男生用兒童八達通搭巴士被發現 呀媽即與司機駁火：我無錢咩而家？
影片在Facebook群組「車cam L（香港群組）」瘋傳並惹起熱議，片中可見一名戴眼鏡的男生一上車，司機已望到實，當他拍卡後發現用的是兒童八達通，司機即問他歲數，他指「15歲」後司機即大聲問他「15歲畀咩小童呀，落車呀，一係比返成人，一係落車」，而男生聽罷即指「吓，我無卡喎，我無錢喎，我問吓呀媽先，佢要我畀成人呀」，車長則不斷大聲重覆稱：「15歲畀咩小童呀，12歲以上就要畀成人啦」。此時呀媽即在遠處問：「點解要畀成人呀，唔係嘟張卡得㗎啦咩，學生唔可以用小童飛咩，你使唔使咁嘅態度呀？」
而車長亦不甘示弱，指「你想點呀，你而家即刻畀呀，唔畀咪落車囉，講咁多嘢做咩啫」。而呀媽此時即大聲回話，指「細路仔唔識嘢得唔得呀？你使唔使咁嘅態度呀？我而家無錢畀你咩，呢D咪錢囉」，說罷即拍回八達通付錢。而男生此時亦即偷偷在旁用手機反拍，並大聲罵回司機，指「我爭你錢呀？吓，使唔使鬧鬧聲呀，好大呀你揸車」，影片到此便完結。
網民起初一面倒鬧2母子：12歲呃車費到15歲仲唔心足
不少網民看到影片後，大鬧2母子不知廉恥，認為2人扮無知好可恥，指「司機語氣係唔好，但呢對母子都好好笑，15歲牛高馬大用小童卡已經好有問題，個𡃁仔仲要話無卡，個老母仲好笑，一句唔係嘟卡就得啦咩」、「2個好明顯係慣犯啦，15歲都話唔知要畀成人價，即係呃足3年啦」、「聽個呀媽口音都知佢邊度人啦，呢D人最鍾意貪小便宜，係要教訓吓」、「15歲的小童好命都已經做了爸爸，仲用小童優惠」、「本末倒置，明明就係博大霧呃半價，做賊嗰個叫人要禮貌啲先可以捉佢，CLS」、「15歲扮無知，臨尾又識執雞鬧個司機，擺明慣犯」、「香港教育冇教好個細路，司機工作唔重要！家教真係冇得頂」。
影片來源成另一討論重點 網民：點解司機自己Set定Cam？
不過，亦有不少網民指司機態度差到不能接受，且懷疑為何巴士內部的畫面可以在網上流傳，指「巴士公司畀呢個權力司機？」，後來有網民發現影片的左下角有「MI」的標誌，相信是小米鏡頭，認為這段影片非官方設置的鏡頭拍到，而是有可能是司機自行在車行Set Cam拍攝，並指「好明顯唔係巴士公司影啦，係個巴士司機自己放個錄影器喺度，如果嗰2母子醒目嘅話其實可以去私隱專員公署告個司機」、「咁仲衰，點解巴士公司容許員工任意攞條片出嚟睇？而家仲要放埋上網，巴士公司一定有責任，而家士公司疏忽管理佢車Cam片，完全無晒私隱，我係對母子就一定告巴士公司」。
