港大護理系新生指控Ocamp成人生陰影　踢爆食草、摸女仔　網民質疑掀罵戰

港大護理系Ocamp被新生網上指控　警方於元朗區拉1名20歲本地男子

警方指近日留意到互聯網上有關港大護理系Ocamp發生違法行為的帖文，同時在8月28日接獲市民報案指一大學迎新活動懷疑有學生干犯罪行。案件經由新界北總區重案組人員接手調查，並派警方人員於8月30日下午在元朗區以涉嫌「非禮」拘捕一名20歲本地男子。該名男子涉嫌早前於一大學迎新活動中非禮一名18歲女子，被捕人現正扣留調查，而案件仍在調查中。早前有大學生於網上指控Ocamp過火行為，而學校更是最近在小紅書爆紅的香港大學。有自稱港人護理系的Freshman在網上發長文指「組爸媽食草，玩水Game唔畀換深色衫搞到個個走晒光」。事主詳述經過令人嘩然，批評不斷，但亦有人為港大平反，指「HKU有反性騷擾政策，若有此當事人應該用正途處理，學生事務處亦須主動協助跟進或嚴正徹查，還大學、學會、學生公道」。

自稱港大護理系新生指控Ocamp玩大咗　組爸媽食草、摸手摸腳好唔舒服

近日網上流傳一篇Ocamp指控文，自稱香港大學護理系今屆新生的網民指「去完細O，我反而唔想讀落去」。內文指三日兩夜的Ocamp是「人生最痛苦的日子」，為事主帶來相當大陰影，事主指控分為以下三點：

指控一：Ocamp內有人「食草」

事主於文內提到「第一日夜晚嘅時候，有一個disco嘅活動，一入到場地就聞到一陣好攻鼻嘅味，令我同其他組員都覺得唔舒服，之後問過組爸媽先知道係「食草」。記得嗰晚場面好混亂，去到後期越嚟越大陣味，好似好多組爸媽都喺度食緊，我同我朋友嗰組嘅爸媽都有食同飲醉，拋低我同其他同學唔理」。

指控二：組爸及工作人員亂摸新生

事主指整個活動都好驚好迷茫，當時場面非常混亂，「有組爸仲要特登對我摸手摸腳，上下其手」，事主感覺到組爸特登摸自己，當刻感到非常不舒服。曾有其他組的朋友亦指有其他工作人員都有對她們摸手摸腳，曾想過向莊員投訴，但因以她們的觀察，組爸媽與莊員相當熟絡，令新生不敢投訴，不敢揭露這些騷擾的行為。

指控三：玩水Game規定不可穿深色衫

到了第二天玩水Game，事主指組爸媽規定大家不可換深色衫，一定要穿薄透的camp tee， 即使事主Camp Tee算深色但亦可看內衣，「加上濕咗水，可以話係走晒光，仲要畀啲唔友善嘅目光望住」。後來事主想換衫都不獲批准，玩完水不可換衣服，身體亦開始不適，一直捱到夜晚回房間後，組媽又不讓其睡覺，逼大家飲，出camp之後個個生病。事主認為整個Ocamp組爸媽都為帶來人生最痛苦的日子，陰影面積極大，希望大家可以幫忙傳開，並問道：「係咪上到大學嘅圈子一定離唔開食草同埋飲酒」。

網民一面倒怪Ocamp文化

看到事主分享後，不少早早脫離大學生活或未有經歷過ocamp的人紛指離譜，指「一早聽過Ocamp好多鹹嘢㗎啦，係D女自己死都要玩」、「其實學校容許攪呢D禽類活動都好有問題，校方可否出來講吓？」、「ocamp變咗質好耐，新一代D風氣睇唔透」。而港大護理系亦作出回應，指「就較早前網上出現有關迎新營安排言論，本會現正積極檢視有關安排並會嚴正處理，如有任何有關迎新營投訴及證據，亦煩請發送電郵至[email protected]，本會必定秉公處理」。

有人為港大平反　反鬧事主唔做Research

亦有Ocamp過來人指「我去/搞過6個OCamp (soc, fac, hall)，OCamp目的係加強新人歸屬感，有玩水、深夜吹水，有時都玩得顛，但咪話食草、非禮，食煙飲酒等行為一定唔可以接受。無證據，參與討論嘅人亦多係道聽途說，但帶嚟污名化、甚至被人利用，影響大而深遠，對大學、學生組織以至大學生都非常不公！HKU有反性騷擾政策，若有此當事人應該用正途處理，學生事務處亦須主動協助跟進或嚴正徹查，還大學、學會、學生公道」、「其實冇證冇據，大家兩邊講咩都冇用，各執一詞都唔知邊個啱定錯，就唔好咁主觀先入為主，唔係blame the victim，但係咪自己都有責任呢去O camp都係自己選擇，咁做research系好基本嘅嘢，去之前睇下 之前去過嘅人嘅cm或者反應，了解下咩系O camp 有咩game，再睇下適唔適合自己去先好去？」此言一出，網民即大爆發，指「我竟然見到有人話報O camp唔睇清楚係自己責任！？我報O camp要預左d人食草同比人非禮？X人冇做research嘅，不如示範吓點樣可以事前research得到nursoc ocamp 食草，水game唔俾換衫, 一定要飲酒之類嘅嘢」。

資料來源：[email protected]