公司當屋企放滿私人物品！網民勁癲分享：帶晾衫竹喺公司晾內衣褲

寓運動娛樂於工作 寵物陪返工兼放lunch跑步

有網民以「最癲見過同事將咩私人物品帶返公司？」為題開post，更拋磚引玉率先分享自己曾經有同事因為搬屋，直接把家中的跑步機帶回公司：「有個同事搬屋話無位放，將成架單車機放咗係公司，話俾大家做吓運動」。

樓主的分享旋即引起不少網民附議，不少網民指自己亦有同事帶跑步機返工方便放lunch時跑步，又分享指不少同事會帶貓、狗、鸚鵡，甚至整個魚缸帶返公司：「唔識去廁所嘅大狗」、「見過瑜珈波，話坐得多攰就郁下做下瑜珈喎」、「鸚鵡，係咁叫嘈生曬！想劏咗佢嚟食」

為公司增添家的味道 辦公室驚變私房菜

大部份網民分享的私人物品都與煮食有關，焗爐、電飯煲、微波爐及光波爐等煮食用具一應俱全，更有網民指有同事在公司煮內地食品「螺螄粉」，點知味道太臭太濃烈，連老細都忍不住send email禁止同事在公司煮或食太大味的食物：「有個同事試過帶左包螺獅粉返嚟公司煮，臭到成間公司好似爆左屎渠咁，啲大佬即刻call埋工程部嚟睇下咩事，最後老細send email話以後唔畀係office食啲咁嘅嘢」、「飯煲！一到lunchtime時間就煲飯」、「光波爐係到燒五花腩都見過」、「電飯煲」、焗爐、微波爐以上全部放自己個位，唔係放喺pantry，日日晏就喺公司煮飯仔」、「多士爐 朝朝在自己位整多士做早餐」

私人物品堆滿公司影響他人 蚊蟲滋生內衣褲周圍晾

除了寵物、跑步機及煮食用具外，有網民表示部分同事的私人物品嚴重影響他人及公司環境，例如有同事在公司放了20多個盆栽，猶如「植物公園」惹來不少蚊蟲：「廿幾個盆栽，成個植物公園咁，搞到勁多蚊蟲」

亦有網民稱公司有女同事貪公司「長期有冷氣」，帶晾衫竹返公司晾自己及家人的衣服和內衣褲：「唔知算唔算癲，物件都只不過係衫，不過係屋企衫，有個阿姐帶埋掠衫竹同衣架，係公司掠佢屋企啲衫，包括胸圍底褲同佢老公嗰啲，佢話公司長期有冷氣好過屋企掠」、「十幾年前，四十幾歲女同事帶埋深圳訂做珠片晚裝返工，唔褶得成件掛係度，重要有十幾套唔同款，放工去學拉丁舞！」