港航紙巾留下神秘符號？ 事主嚇怕網上求救 行內人拆解背後意思
廣告
大家如果發現陌生人遞給你的紙張上，寫有奇怪的符號會點樣做？近日有網民在Threads上發帖，表示最近乘搭香港航空時有空姐遞給他紙巾，但上面的一個角落寫上幾隻字，令事主嚇怕上網求救。
事主搭飛機遇神秘符號
近日有網民在Threads上以「空姐俾我張紙巾有奇怪符號，我有冇啲咩要擔心」為題發文，附圖上可見，紙巾除了印有香港航空的logo，左上角更寫下一些奇怪符號，令人百思不得其解。
網民爆笑回答
不少人網民見狀都好奇背後是否暗藏甚麼意思，紛紛留下各種爆笑回答「上次我個fd用完呢張紙就過左身，聽講要玩board game解咒」、「有內奸」、「隔離位有古怪 要小心」，甚至貼出《賭俠1999》「水有毒」的劇照；亦有網民表示事主被空姐暗示「房number」、「佢想同你表白」、「其實佢自己寫咗個電話俾你 集齊8張紙巾就有齊」。
不過樓主在留言區反擊：「當一部分嘅人見到空姐就諗咗去性方面嘅時候，我想講其實我只係擔心佢係啲咩邪教嘢」
行內人拆解背後意思
最後，有位自稱空姐的同行就現身揭開迷底：「同行代答，佢寫47k（座位編號）應該係個客瞓咗想mark低但唔小心畀咗你」，令樓主安心表示：「終於有同行俾到解答我，而唔係話張紙重用。」
圖片來源：Threads@yyin_ch
