的士司機斥港客「好低質」 要求多多留難優質司機 網民嘲：今舖撐你啊
的士司機自覺好優質 反怪乘客低質多要求
近日在LIHKG討論區上，有一個關於的士司機的帖文廣被討論，事關帖文中提到曾有的士司機接受傳媒訪問，對著鏡頭前大大聲指「邊個話司機唔優質？係司機優質，乘客唔優質」、「個個都要求多多」；而面對乘客指控，稱「司機態度差之餘仲會特登兜路」，司機即理直氣壯地反駁，指「香港兜路係為咗避開塞車，兜路係必需㗎」。
港人「表示認同」：叫佢哋過海都算係高要求嘅
這段訪問內容即使過了一段時間，但不少港人表示「即係由以前到而家畀人話咗咁耐都無改過，永遠錯嘅都係乘客」。有港人更指「真係聽完都好認同啲司機，乘客又真係幾多要求，坐上車要佢郁車咁離譜嘅事都夠膽要求」、「真啊，今鋪撐的士司機。乘客又要求過海、又要求短途、又要求長途、又要求找錢、交更時間又要求開車、傷殘人士又要求要坐車，真係聽見都覺得唔合理，要司機開車」、「叫的士過海真係好高要求，乘客要過海，點解唔搭咗港鐵過去先，再喺嗰邊搭的士去目的地呢」、「兜路又真係為你著想喎，驚你原本條路太直接好快落車，所以先兜路畀你唞耐啲，真係用心良苦」。
港人續指：聽完都唔想難為司機
港人指為了避免難為司機，自己都是選擇「Call Uber算」，認為「咁辛苦嘅工唔夠膽辛苦司機去做」、「對唔住，我畀錢你只係要求點對點接送服務係我錯，真Sorry，我應該一上車問聲司機大佬你今日想去邊、想收幾錢、今日心情好唔好」、「乘客真係衰，優質司機要嘅優質乘客應該要一打開門，每人擺低1嚿水，跟著閂門行問就得喇，要求多多」、「你開海鮮價$1,000蘭桂芳去IFC，我唔搭都係我唔啱，我都係去『勞役』Uber司機，替你哋報復算」、「有人逼你接85折Order？明碼實價嘅order你又唔接。唔想食單程隧道咪唔好排過海站，有人用槍逼你排？個客唔開尾箱都塞到啲貨入後座你憑咩收佢錢？你可以因爲塞車而兜路，但你要同個客講o 唔okay，正如餐廳人地叫乾炒牛河，你無河粉，會唔會唔問個客就幫佢炒個貴啲既龍蝦伊麵然後要人啃咗佢？講到尾，又要畀着數人搏生意，人地食咗你甜頭你又唔開心，你講曬啦」。
