15歲仔第一次去日本興奮發文 1句潮語遭家長揶揄反惹網民鬧爆

00後首次去日本 發文稱：打敗99.9%中學生

近日，一名15歲香港中學生在社交平台Threads發帖，分享自己首次前往日本旅行的經歷，以「15歲人生第一去日本 打敗99.9% 香港中學生」為題，附上兩張旅行照片，表達喜悅心情。

家長網民揶揄樓主自視過高

未料，該帖文卻引來部分家長留言揶揄，指責樓主炫耀及自視過高，有人稱我個仔1歲生日嗰日起程同我哋一家去咗歐遊」、「我6歲已經去，你咩料」、「有幾勁？我個仔未滿月已經去咗15次日本，年輕人做人要謙虛啲」、「我9歲自己1個人搭飛機去台灣，咁樣可以打敗幾多人呀？當年係1989年」、「好明顯係99.9%香港中學生打敗你啦，睇你個樣應該人哋連快1個鐘都唔X知」，甚至有家長豪言「我個女1歲已去日本，你收皮啦」。帖文迅速在網上發酵，引發網民熱烈討論。

年輕網民一面倒狠批：跑出嚟認叻認屁

帖文引起全城熱話，不少年輕網民都明白樓主所使用的「打敗99.9%」僅是00後常用潮語，旨在表達個人成就感，並無炫耀之意；同時批評部分家長未能理解年輕人的表達方式，卻急於在留言區冷嘲熱諷。

批評家長揶揄及缺乏理解

不少網民批評部分家長未能理解年輕人的表達方式，卻急於在留言區冷嘲熱諷：「成班中年阿叔阿嬸喺度跑出嚟認叻認屁……打敗99.9%中學生一定係鬥早㗎咩？唔可以鬥遲嘅？人哋有講打敗邊方面咩？」、「成班人要贏一個15歲嘅細路做乜X？」、「見到嗰班香港80後70後家長喺度獻醜，好心連潮語都唔識」、「作為一個成年人，見到啲不知所謂冇教養嘅成年人嘅留言，實在令人慚愧」、「我哋呢啲中年/老年人……真係要好好了解而家年輕人嘅話題/流行用語……而唔係用『長輩』身份嚟教訓人用錯字眼……只會令後生仔愈嚟愈唔想同我哋溝通」、「家長們要練下自己閱讀理解能力」、「小朋友喺度玩，你班大人就咁認真衝出嚟。」

「打敗99.9%」僅為潮語無需過分解讀

另外亦有網民解釋指「打敗99.9%」僅是00後潮語「打敗99.9%只是形容詞啫，即係大癲唔係真係癲。」、「即好似90年代周星馳無厘頭文化，將毫無關係嘅事串連搞笑，例如嗰啲『你講嘢呀？』。」、「幽默感很重要。」

鼓勵樓主及正面回應

有部份網民亦對樓主表示支持：「唔駛理呢班人……玩得開心啲。」、「加油。」、「旅途愉快。」、「食多啲拉麵，玩得開心啲！」、「enjoy日本！試多啲便利店嘅嘢食。」、「好好體驗自己獨特日本旅程。」

樓主現身說法籲大家和平相處

樓主及後現身留言區，表示自己沒想到一下機就見到帖文成為熱搜。他解釋，從小到大身邊好多人已到過日本，而他今年15歲才第一次去「所以先話自己係少數咁大個都未去過日本」，他續指「明白大家難免會get錯的」，並希望留言區能夠保持冷靜「和平相處，唔好嗌交」、「同時亦感謝所有明白同幫我解釋嘅朋友們」。有網民見到樓主的解釋馬上稱讚他處理手法成熟「唔會逐個留言去反駁，又唔會因為有人幫佢講說話而得理不饒人，迅速收拾心情去enjoy個trip，EQ真係幾高同幾成熟。」