多區暴雨又水浸　天文台App竟顯示九龍城區只有小雨　港人：台長你無嘢呀？

紅雨下港島東再次變澤國　港人鬧爆：大雨到根本同黑雨無分別

今早不少港人又再次濕身上班，港島東又一次變成澤國，有市民搭巴士上班途中形容「好似搭緊船」咁，事關當巴士駛至大潭道時，大量泥水從山坡去水渠不斷湧出，馬路猶如變成激流，水深高至半個車輪，貨Van、巴士都要小心翼翼駛過，以免又一次發生死火事件。

因風暴海葵殘餘的相關低壓槽關係，華南沿岸繼續受其影響，天文台連日來都預料局部地區有大雨，而今日亦在網站上更新指「一些低窪地帶及排水欠佳的地區會出現水淹。可能受大雨及水浸影響之市民應採取適當的預防措施，以防止可能引致的損失。大雨可能引致山洪暴發，市民應遠離河道。可能受河道氾濫影響之市民應採取適當的預防措施，以避免損失」。

港人鬧爆天文台台長：你直接改名做「陳栢雨」啦

今早最大雨的時候，正值一班打工仔趕上班的時間，天文台在Facebook表示暴雨可導致嚴重水浸和交通擠塞，請注意安全。隨即引來近300個留言，不停指責稱「咁都係紅雨，已經路都睇唔到，能見度勁低，又大雨」、「行雷行到核爆咁，真係驚」、「下半身濕晒，其實今朝6點東區同南區已經係黑雨級雨量，70mm/hr喎，點解仲係紅？又要就政府？」。而更多人逼問天文台「黑雨未，咁大雨點行出去呀」、「係水浸呀，唔係積水呀，浸到上車轆啦，幾時轉返正字呀？」。而天文台台長陳栢緯亦被怪責，指「改名做陳栢雨啦，咁鬼大雨都只係紅雨，根本同黑雨無分別」、「天文台台長改名叫陳栢雨啦，襯你多D」、「做完縮頭烏龜未，問咗咁耐都無答過」。

建築工程師潘焯鴻：天文台app收埋佢啦

除了網民鬧爆天文台，建築工程師、現為「中科監察」主席的潘焯鴻亦叫天文台「收啦」。他指出，今早先黃雨再紅雨，雷電交加的惡劣天氣情況下，九龍、港島東區、大潭及白筆山區累計雨量+100mm，但天文台app的「定點大雨資訊」在大雨中竟然顯示無野，只有九龍城區2-15mm小雨！更在帖文中Hashtag了「香港天文台 HKO」，稱唔work就收埋佢啦！一眾網民看到後，又再抽水，指「台長你真係無嘢呀嘛？又叫人留意天文台資訊，個App又唔Update，信你D乜？」