港女住男友公屋被房署發現養狗　情緒失控苦訴另有內情　網民斥唔抵可憐

港女住男友公屋被房署發現養狗　勒令送走無計可施：情緒失控了

該名港女的事跡在Facebook「公屋討論區」備受討論，女事主稱自己養了狗狗7年，一直都是租屋住，但因負擔不到租金，每個月都還緊錢，要到下年9月才還清錢務，屆時才可再搬出去住。目前搬往男朋友公屋暫住，「住咗幾個月，遇到房署洗樓抽查，發現有狗之後已經帶走佢，狗酒店租金比唔起，朋友屋企擺唔到咁耐，呢兩個星期我已經不停搵辦法，因為呢件事真係搞到我情緒好差，瞓唔到，準備簽紙加名，申請狗陪伴」。女事主因而發文問大家「究竟我係應該去睇私家定係去政府排街症，係咪有排等？我已經情緒失控到想自X」。

網民聽完解釋後大爆發：不知所謂！

豈料有一大批網民看到女事主的情況後，不但不同情，還「鬧多兩錢重」，指「重點係你無戶籍，係非法居住，仲講咩申請陪伴犬」、「無錢交租有錢養狗，明知自己經濟唔穩定，好心就唔好養，而家累咗隻狗」、「自己都無能力，仲養狗？不自量力的後果，自己負責」、「其實養嘅第一日就要諗，唔係到畀人周到斷正先嚟諗」、「自己無能力就不要做，強行做就要負責任，發爛渣是得不到同情更不能解決一切！」、「本身自己都無名住落男朋友到，狗陪伴陪邊個？陪男朋友？針咭/狗牌又唔係佢名」、「不知所謂，養得狗即係有錢啦，個個用咁嘅藉口咪個個都可以養狗，咁洗乜住私樓」。

另一邊廂痛批香港人無同情心：搞清楚狀況先啦

眼見網民一面倒鬧事主，不少人為其發聲，指「而家你哋睇清楚人哋情況未啊，有邊個會預視到自己將來會無錢啊」、「如果係人呢，生咗個小朋友，然後有絕症，你無錢醫，你會唔會叫佢無錢養就唔好生，邊個會估到有咁嘅事發生，大家畀番啲同理心，他朝君體也相同」、「見到好多人講事主無錢唔好養狗⋯⋯7年前養，可能事主當年環境好好的，人的福禍好難講，幾年間發生好多不如意事令到佢負債都講唔定……」、「啲人個個留言話送畀人、搵人領養，你會唔會養唔掂個仔就話送畀人養啊，同理心都無學咩人批評」。

另外，亦有網民竟指「公屋不嬲唔畀養狗，但畀養貓，貓唔會吠仲可以幫手捉老鼠，住公屋要養寵物就養貓」，此言論又掀起另一起罵戰，指「咁狗都可以看門口防賊啦，你都打橫嚟講，你而家針對件事定針對隻狗嚟講啊」，而對方最終仍強調自己意見，指「貓唔會吠唔會咬人！你識唔識」。

同時，亦有人鼓勵女事主，指「唔好咁灰心，房署都有情講。畀個充份理由他們吧！我隔離都有人養狗，我哋唔投訴，狗狗冇事」、「其實樓主應該睇吓身邊有冇朋友住村屋或者私家樓，可以暫托住隻狗，去婚姻註冊處註冊之後交返文件畀房屋署申請加名，之後要搵政府醫生寫信證明你需要狗作陪伴先得，唔使嘥錢去私家醫生寫信，房屋署唔接受㗎，我都試過佢哋話只接受政府醫生信，所以樓主加油呀，珍惜生命唔好做傻事，辦法總比問題多」。