《35+ LOVE》｜楊淇3次約會暴露真面目 屢次黑面發脾氣惹反感：成個野人咁
《35+ LOVE》楊淇成最乞人憎港女 屢發脾氣惹觀眾鬧爆
於節目中，楊淇暫時已出席過3次約會，她與自己心儀對象Yatman出街約會時，主動問對方年齡，Yatman當刻直接回答29歲，再反問楊淇歲數，豈料楊淇即時惡人上身般指：「我會話自己40歲囉！唔想畀人話，過埋生日就39」。黑完一次面，楊淇又突然惡人上身，指「唔使理過去，最重要係而家…唔使介意人點睇，最重要自己」，就算Yatman屢次想作出回應，但依然被楊淇「霸住講」，自己根本「無得Say」。就連娟姐都忍不著發火，指「我明白活在當下，但人哋想了解你或者傾吓偈，你就講一大堆道理去推人」。而陳柏宇更「講到入肉」，指楊淇為人負面，成日諗乜都負面，但就喺度扮正面囉！
楊淇不止一次破壞氣氛 前2次約會反白眼又黑面
除了跟Yatman約會令人睇得氣憤外，其實前2次與其他男生約會時，楊淇的形象已經開始插水，更出現不歡而散的畫面。例如與Adrian約會時，楊淇起首已發火，指「呢個問題我被問過9億次，唔好好似記者問嘢咁啦，你想我hea答定認真答」，後來Adrian又叫楊淇估自己歲數，楊淇再即時反白眼兼不耐煩，指「又估，都話咗唔鍾意估咯，我已經唔想知，你唔好講」。
眼見楊淇突然大爆發，Adrian無奈之餘亦散發不滿的氣息，但明顯沉著氣忍受。後來Adrian轉移話題講到拍劇的話題，問楊淇否有表演慾所以當演員，楊淇稱自小自己都膽小內向，且表示「成日叫我做自己，我日常生活都做緊自己，拍嘢都做自己就好悶」，Adrian聽到她分享後，即表示「你唔似喎」，這句又再次令楊淇大爆發，指「無咩似唔似！咩叫似唔似？每次聽到啲人話『你唔似咩咩咩』，我就好厭惡」，說罷便大步大步地行走。
而另一次與阿B約會時，是楊淇主動邀約對方，本來2人逛街時仍相安無事，惟入到餐廳，楊淇又變臉，黑著面稱：「得番半個鐘，好趕，咁樣食無心情，我個腦function唔到，你揀啦」。阿B望著黑面楊淇，嘗試緩和氣氛，但楊淇依然表現得相當不耐煩，無論男方說甚麼，都通通Say No。
網民：佢到底搞乜，變到成個野人咁
楊淇一次又一次的惡女性格，惹來網民不停唾罵，指其憑實力單身。不少留言指「佢完全唔識尊重人，係咪以為自己好大粒」、「佢問人嘢就咩都得，人哋問佢幾句就要同人嘈交，又要講經咁，完全唔想同佢講嘢囉」、「40歲單身有原因，注定無出Pool，之前仲話恨拍拖，根本落晒閘」、「黑面落閘，仲成日斬斷人哋講嘢，好討厭」、「成日好用力扯起個嘴去教訓人，佢反白眼真係好乞人憎」、「佢私下應該一個朋友都無」、「扮有個性有諗法，其實係無修養，完全係犯眾憎」、「都唔知做乜成日撩交嗌，得罪你咩」、「講真，人哋又無得罪你，佢對人嘅態度咁會唔會太過分？個男人其實已經好好品。。。之前一直覺得奇怪佢演技明明唔差但就越做越無，睇嚟可能係性格影響」。
楊淇被指8年間轉變非常大：以前都話算係氣質女
亦有網民指「明明以前楊淇都唔係咁，越大越變到成個野人咁，又粗魯」、「以前睇佢拍劇，會覺得佢幾靚，又詩文又有氣質，係型女加氣質女」、「睇佢喺個真人Show到行到成個野人咁，好難想像以前咁得體」、「以前明明係玉女」。翻查資料，楊淇原名楊美玲，因英文名Kate，改藝名為楊淇，是土生土長香港人，卻經常被誤以為是台灣人，她曾表示自己喜歡周迅，也喜歡舒淇。而她於2004年因拍攝恩師張艾嘉導演《20 30 40》，而獲得《金馬獎》、《金像獎》的「最佳女配角」提名，亦參與過不少舞台劇、電影及電視拍攝，8年前拍攝HKTV《導火新聞線》時亦相當受觀眾歡迎，走氣質路線。而早前受疫情影響下，演藝工作受阻，楊淇因而到大學當保安，後來更學習幕後製作。
