東張西望｜MIRROR補辦演唱會鏡粉淪為苦主 換票安排無人知咁離譜？
MIRROR補辦演唱會 忠心鏡粉舊有門票竟兌換不了變廢紙
MIRROR演唱會去年因嚴重意外而腰斬，當時官方稱會補辦演唱會，已購買門票的鏡粉可待官方公布後續安排詳情。直到近日，MIRROR演唱會主辦方終於公布《MIRROR FEEL THE PASSION CONCERT TOUR 2024 · HONG KONG》的詳情，為MIRROR首個巡迴演出，首站由香港出發，包括去年未能順利舉行的9場，一共舉辦16場。終於等到這日來臨，卻有大批鏡粉上《東張西望》大鬧主辦方，事關原來持有去年演唱會門票的鏡粉原來一直對於「退票/換票」的安排一概不知，離晒大譜。
其中一位上鏡受訪的陳小姐指，自己要撲一次門票都非常艱難，「我嗰時被要係買到Miro特別場尾場，我真係好興奮好興奮，我買到最前幾排，一張$1,280，一直Keep住張飛等公司講幾時再搞返」。陳小姐指自己用實名制購買門票，一直以來都透過電郵收資訊，因而一直都好安心地等待。「我無諗過係要我主動去Facebook同Instagram睇消息，我鍾意個偶像，我會Follow佢哋個人官方帳號，但我係無必要去Follow埋你公司個社交平台㗎嘛，你尋日先公布2024詳情，點解要Set一個咁嘅截止日期，好唔合理」、「今次真係心淡，賣飛就鋪天蓋地，換飛就收收埋埋」。
鏡粉：支持者啲血汗錢都要呃
而另一位Ricky鏡粉則指自己每天都會看Facebook和Instagram，但根本從來沒有看過相關消息，而他到官方帳號查看時，發現為數不少的鏡粉留言，指自己從來不知換票安排，但已被通知「錯過期限」。大家無論透過電郵、消委會等方法投訴都無果，而每個人發送電郵後都只有同一個回覆，指「不再跟進」。Ricky指自己身為支持者，對於今次安排十分失望，認為「你2024年個演唱會都未搞，又唔畀人退飛同換飛，你變相同一個位收2份錢，我哋血汗錢都要呃，完全睇唔到消息，亦無聽人講過」。
節目組：MakerVille未有回覆查詢
而同樣是鏡粉的曹生、曹太亦指，自己不需要任何額外的東西，「真係好失望，門票真係好難買好難買，我買咗4連位，我2個囡囡好鍾意佢哋，當時每張買$880，我丁點Extra嘢都唔要，我淨係想要返我應得嘅權利」。而MakerVille其實早在5、6月時在Instagram公布退票/換票安排，昨日亦再出POST講述安排，但若然門票持有人錯過了時間，就惟有自理。而《東張》亦向MakerVille查詢事宜，但節目內容指「未收到任何回覆」。
而節目播出後，坊間亦有大量鏡粉指自己「睇完東張先知喎」，而其官方Facebook專頁亦被洗版投訴。
苦主上《東張》求助 鏡粉鬧爆：根本成單嘢自導自演！
多名苦主上《東張》求助，網上亦有大批留言指自己從來無聽過換票安排，面對排山倒海的負評，永遠支持鏡仔的鏡粉旋即大反擊，質疑整個訪問都是TVB自編自導自演。「有咩可能一公布演唱會詳情就即刻有咁多人上去做訪問」、「點解要咁黑心搞我哋MIRROR」、「有買飛一早都知已通知要留意喇！其實點解唔會留意佢哋Facebook專頁，解釋唔到喎」、「擺明TVB自編自導自演」、「根本成年件事講唔通，Send Email畀你，你都可以話唔睇㗎啫，講真係自己就係消費者，應該自己留意，乜都賴人哋，個個都知係得你哋幾個唔知，講唔講得通啊」、「買得演唱會飛，就係佢哋Fans啦，就算你唔係Fans，你無Follow佢哋公司，咁你上Facebook都大把人講啦」、「King jer都有講，如果唔上網又淨係睇無綫，咁點解會識得買Mirror飛」。
官方回應負評：再安排退票事宜
面對大量持票人士的不滿聲音，當中包括位置安排及退票爭議，MakerVille亦在社交平台回應事件，指「在退票及兌換門票程序期間我們收集了超過九成半的門票，由於演出場地有所更改，電腦系統已經處理逾8萬多張門票資料，當中會根據原有門票資料進行分析，再符合各項特定條件，包括與舞台的距離、相連座位等因素，從而配對最佳座位」、「如未能出席所分配的場次或其他原因，可於2023年12月15日或之前提出退票申請」。至於未有在原定退票限期（2022年9月15日至2023年9月14日）提出退票的申請人士，官方會再安排退票事宜，有關詳情將於日後，在MakerVille Facebook 及Instagram專頁公布。
不過鏡粉閱後更嬲，皆因不少人投訴原本買了最前、最貴、最好的場次，經重新安排後竟「越貴坐越後，越平坐越前，離晒譜」、「尾場變中場」等，而官方回應指重新編排位置皆屬「最佳位置」即激嬲鏡粉，紛紛投訴指「咁叫最佳安排？原本880，而家畀最後山頂位，呢個合理咩？認真咩？搞緊笑啊？」、「我原本2張係買$1,280，而家換畀我嗰2張係$1,080位，咁叫最佳？」
