東張西望｜67歲單親洗碗工痛哭追討萬6元維修外牆費　網民意見相反掀罵戰

單親媽靠洗碗賺錢撐起成頭家　夾錢維修外牆獲政府退錢竟懵然不知

「萬6蚊，唔比返我我跳樓，我先生92年過生，我無拎過綜援，咁辛苦賺嘅錢」，這番話由67歲的獨居萍姐說出。近日她上《東張西望》指自己住的大廈於2004年時，被強制要求維修外牆，因而當時把辛辛苦苦儲下來的4萬幾元交作費用。而近來她從街坊口中才發現，原來政府於7年前有補貼，大廈業主每人有萬6蚊退款，業主自行去管理處拿支票，惟戶戶有份，只有萍姐無法取回。原來萍姐只有小學一、二年級的教育程度，只看得懂少許中文字，如「中美大廈」中，只看得懂「中」、「美」、「大」。她表示當時對退款毫不知情，「我好多字唔識，唔識字睇唔到，全部無人提過我，電話都無，無人通知我，叫我點做」。

管理處稱期限已過無法退錢　上門搵業主立案法團主席被投訴騷擾住戶

萍姐向管理處詢問詳情，豈料對方指「過咗6年無得比」，又指要調查銀行，會替萍姐「問問」，惟一路追問，一路都毫無答覆。而碰巧今年大廈業主立案法團和管理處都有變動，於是萍姐聯同節目組一同上門找現屆主席李生，但拍門後無人回應；於是上門找上屆主席（即今屆副主席），同樣都無人理會。而正值此時，突然有大廈保安出現阻止拍攝，指有住戶投訴被騷擾，「但咩身分嘅人投訴我就唔知啦」。

靠洗碗日賺$580　萍姐心酸哭訴：我好辛苦，萬6蚊對我好重要

追討無門，倍感灰心，萍姐指「知我問，個個都唔講，我日日洗碗，我好辛苦，每日做十個鐘，得$580一日，我個女細細個4歲無爸爸，我都係咁捱住養大佢，萬6蚊對我真係好重要，好唔抵，我洗碗洗到手都骨跑出嚟，而家日日食唔安瞓唔落」。而同大廈有獲得退錢的業主表示，當時經由管理員通知並經他們取得支票，拿到支票後自己到銀行入票。

萍姐原來非唯一不獲退款業主

訪問進行時，節目組湊巧遇上一名正把單位放租的業主，她得悉當年有退款1萬6千元的消息感到驚訝，指一無所知。「2016年有退我無理由唔知，我有開信箱，如果有派通告同貼通告，無可能唔知。就算你話你有做齊呢2件事，你都要直接通知業主啦，追管理費你又識打畀業主，退錢你又唔打嚟講？」而節目組事後再打給管理公司時，對方回應指「每戶邊個收咗票，當時應該要簽收，我地交接時係搵唔到記錄，都有發信去政府叫幫手逼舊公司做交接，對方指要調查，我哋都要等回覆」。

律師：有正本收據好大機會拎得返　萍姐聽後表示「好舒服」

節目找來陸偉雄律師問及意見，他指「搵唔到記錄係佢地問題，萍姐手頭上有正本收據，有好清晰證據話畀左4萬幾蚊，萍姐係有權拎」，他續指萍姐「唔識字仲有利」，大廈要張貼告示，但業主「唔識字，張貼咗都唔識睇」，若被問為何當時貼出通告仍不知時，這個原因正正可做解釋。萍姐聽陸大狀一番話後即時表示「我覺得好舒服，我而家有期盼」，其後再去小額錢債審財署追討，管理公司表示「要查我銀行戶口，都無我號碼，點查，分兩次拎支票都無比我，點查？管理公司想推翻我無拎過萬6蚊嘅供詞，我攞唔到唔會罷休，我好辛苦賺返嚟D錢」。

網民再掀罵戰：唔識字都唔係大晒㗎！

網民聽完極力支持萍姐爭取，更指業主立案法團常有不公平事件發生，「事件中最少兩個人無收過回款，加埋都$32,000，未必咁少人無收到，正副立案法團主席嫌疑非常之大，可以嘗試揾當區立法局議員幫手」；不過亦有一邊網民指「唔可憐」！事關他們認為「唔識字唔係大晒」，指「其實有冇登通告？如果有你唔去理解，咁自己都好大問題。不要成日話自己唔識字， 唔好乜嘢都賴！自己都要付上大責任。 唔識字可以問㗎⋯⋯ 過咗咁耐，好難攞返啦」、「我唔明， 叫佢交4萬時又識字/有人聯絡佢， 到退款時又唔識/無人聯絡佢？」、「今時今日，係香港地唔識字都仲生存到，你都幾犀利」、「片段中女事主說自己有個女兒，假若她真的目不識丁，那麼女事主為何不找女兒協助呢？唉！」

不過網民力撐萍姐，反斥「好多基層清潔姐姐都唔識字，佢哋做梗最辛苦既工重要俾人厭棄」、「大驚小怪，以前60年代70年代，沒有免費教育，窮人為了生活去工廠工作，你好命有書讀，讀得多書,不懂尊重人是低品格,希望你惜福！」