東張西望｜港人傳授北上食大閘蟹攻略 逼爆2大熱點食得滋味 網民：悲哀
港人北上食大閘蟹攻略瘋傳 《東張》直擊買蟹過程：好抵好正！
香港餐廳食大閘蟹，隨便都要$200-$300一隻，即使買回家自己蒸熟，也要過百蚊一隻，因而網上就有人教路，去福田區農批市場，節目組去到市場內的鮮活館，一入場已見不少港人忙著揀蟹掃貨，有檔口更標價$15一隻。其中一對港人越揀越興奮，指「朋友介紹嚟囉，上星期先嚟完，我一次過買咗20幾隻。香港食好貴呀，$150一隻到啦，差成5倍價錢，呢度$30-$40咋嘛，好靚㗎啦」。
另外亦有一名師奶開心地稱：「貪新鮮，貪得意呀嘛，都OK㗎，幾大隻，30幾蚊成6両呀」。而男主持訪問到其中一檔檔主，對方指每逢星期六、日，基本上都塞滿港人，全天候都有港人來到購買大閘蟹，每次最少買10-20隻，「如果佢哋唔買咁多隻，基本上維唔過條數啦」。
盒馬鮮生超級市場即買即食 港人：食足2盤啊
有人買活蟹帶回港，有人則選擇北上即買即食，事關網上攻略指盒馬鮮生的超市，可以即場揀蟹、煮蟹、食蟹。即使拍攝當日是星期二，現場可見人頭湧湧，幾乎圍住大閘蟹區的，全場都是港人。就連移民加拿大的港人都要專程到場開大餐，指「好鍾意食蟹，未見過可以喺超級市場買海鮮，佢蒸埋畀你，好似見到都係香港人」、「喺度食4隻，諗住再買多4隻返香港，香港政府都講咗要求㗎啦，自用數量每人1、2隻，低於香港政府要求我覺得係可以」。
另一港人則指價錢便宜過香港少少，但主要是吃氣氛，「我呢盤都第2盤，大約$190多，食飽食唔晒就帶返香港，完全無限額咁食，最緊要開心」；「你見我哋食得咁滋味就知正啦，OK喎，幾正喎」，而在超市內加工每樣都只需$10。
而節目組更指安全性有擔憂，事關當年香港禁內地大閘蟹入口，就是因為食安中心檢驗到內地大閘蟹樣本含有毒物質，現時港人繞過政府把關買嚟食，「有事上嚟毫無保障」。
網民：《東張》最後一句真係串爆班老人家
不少網民看到港人峰湧而至的畫面，大感悲哀，指「是因為貪小便宜，歪理都變道理了。前些年內地人湧港購物，就是為了食物比較有監管，就算內地進口也有抽檢。想不到今天部分港人，變得比內地人還~~唉！」、「會唔會有一日被人打去東張西望揭發、喺唔知邊個地方有人打開渠蓋、裡面養咗好多隻大閘蟹」、「大陸從蟹苗開始就混入大量抗生素飼養、人食咗就間接吸收抗生素『百毒不侵』、大陸蟹農不吃大閘蟹」、「食你唔死算你大命，最緊要平價，Hk人最死唔蝕底性格，我就多謝夾承恵，大陸食品⋯咪L攪我」、「其實主要都係班40歲以上嘅人先上去食，悲哀，命都短幾年」。
而亦有網民指《東張》最後一句根本串爆班老人家，指「其實係暗啞底串佢哋無知，大陸咁多食安問題當睇唔到，食完出事咪加重香港醫療負擔」、「一句『禁內地入口就係因為驗到有毒』，X打成班唔識死嘅老人家，仲食咁多毒落肚」、「本來都睇到嬲嬲哋，最後呢句又幾爽，笑死」。不過有網民反留言指「其實香港啲大閘蟹都係深圳send過嚟，有咩問題，上去食都平D，慳返筆」。
