東張西望｜住戶日夜慘被樓上噪音轟炸　天花都鑿穿滴晒水　網民：主持好嘢！

《東張西望》2大主持勇戰瘋佬　住戶被樓上單位日嘈夜嘈好煩燥！

訪問中，其中一名男住戶劉先生剛由公屋換了長沙灣一間居屋，一心以為買到樓可以安居樂業，豈料自己原來變了「替死鬼」，日日夜夜被樓上單位「揼揼揼」。劉先生指，自6月入住起，樓上每日都會不定時地發出揼揼聲，「5，6點就會有拉枱、鎚仔聲、乒乓波呢D聲，我自己本身係貨車司機，每日凌晨3、4點返嚟瞓，瞓唔夠3、4個鐘，樓上就開始嘈，最少持續1個鐘，自己甚至要匿返落架貨車到瞓」。而訪問途中，主持輝仔都聽到樓上發出的噪音，頻率相當緊密和大聲。

劉生原來做了替死鬼　樓上「爆音毒」皆因同上手業主有仇

而據了解下，原來是因上手業主與樓上單位有恩怨，劉先生指「聽講好似因為上手業主一家4口，有小朋友，小朋友夜晚9點幾10點玩又開晒窗，嘈到樓上，佢哋互相有投訴，有積怨，所以而家就報復囉」。無端端做了替死鬼，劉先生曾上門求對方收手，惟對方即問「你哋係咪識上手業主，你哋係咪朋友」，劉生一家相當無奈，表示自己只是透過地產購買單位，但樓上單位不相信，並持續發出噪音騷擾。

主持輝仔勇闖樓上問到底

女主持輝仔隨即上樓上拍門，希望能向對方了解情況並作出勸阻，惟輝仔只說了一句：「Hello，你好啊，我哋係東張西望㗎⋯⋯」，一名背心男開門看到她後即嘭門走人。輝仔亦相當盡責，繼續在門口問對方：「因為我哋收到求助話你呢度成日發出聲響，你有無咩回應啊？」，結果依然無人回應。

另一公屋住戶被敲穿牆　全屋滴水好閉翳

另一方面，住在公屋的余小姐同樣求助《東張》，她指樓上單位有時在早上，有時在晚上不停敲，頻率相當高，每次最少維持1小時。余小姐指每晚凌晨2點對方就開始敲地下，令到她家中的天花板直頭鑿穿，甚至滴水；而廚房頂天的櫃亦同樣鑿穿，同樣有滴水情況，家中傢俱及廚房用具都基本上用不了。對於，男主持黃耀英即陪同余小姐到樓上了解，叫其收聲停手。

黃耀英嗌破喉嚨力戰樓上敲牆伯：你敲咩啊？

Darren起初向單位大叫，雙方來回「交戰」嗌破喉嚨

黃：想同你了解情況

伯：洗咩同你了解

黃：樓下滴水，你知唔知？

伯：樓下我點知啊

黃：你有無敲啊？

伯：咩敲呀？敲個喉管囉

黃：喉管有咩問題啊？

伯：無問題！

黃：樓下話你係咁敲敲敲啊！

伯：咩敲啊？

黃：你會唔會停啊？

伯：停囉

經過一番交戰後，呀伯答應會停手，豈料轉個頭來又再用力敲，Darren即再大叫：「你敲咩啊」，對方指「敲喉管囉」，而Darren再稱不如找房署來幫伯伯解決問題，伯伯不但拒絕，更指「唔使啊，問我點解，問你自己囉， 我唔使你呀，無點樣整，求其囉扔咗佢，唔會阻地方，好似你咁，嚟少陣咪唔會阻囉」，最後Darren再問多次：「你夜晚可唔可以唔敲啊」，老伯即回應指「夜晚緊係無敲啦，敲嚟做咩啊」，而Darren亦再強調「咁你夜晚唔好敲啦伯伯，唔該你」。

房署：要搬走必要有醫生證明

事後伯伯會否停手就有待觀察，但余小姐指問題纏擾多時，自己曾向不同部門投訴但亦無果，房署指若想搬走，就必要提供醫生證明「因為噪音而導致精神出現問題」，根本無法解決。

網民激讚兩大主持好嘢　稱：畀我就用神器反擊

遇噪音騷擾的問題，不少網民看後都表示身同感受，更指2名主持做得非常好，亦相當勇猛竟敢大戰瘋佬，「男主持問得好過癮，好叻仔，好勇，大叫D癲佬叫收聲」、「輝仔真係到而家都好有使命感，自己單拖行咁埋問個癲嘅，勁！」；亦有人指自己都遇到這些問題鄰居，「感同身受！樓上都係一對老夫婦，早晚吵，掉嘢，拖凳。有時孫過來就成個鐘跳來跳去。漏水又唔比人入屋睇，投訴到食環署都要求要入屋紙先得。無辦法，呢種人等天收啦！」、「case 和我呢到一樣，樓上嗰條阿婆不定時咁嘈，零晨 2-6點又顛，有哂錄音，寫哂信去房署都告唔到佢」。

網民教路，指「第一個哥哥太斯文，遇到呢d甘無公德旣人，只有以其人之道還治其人之心，整支頂心杉畀佢，再唔係就出封律師信畀佢， 話佢令到你精神有損失，無法工作，追討賠償」、「歸根究底，都係因為噪音滋擾係冇後果。冇人執法，冇人被起訴，冇人被罰。 到底執法困難喺邊度？」、「對住呢啲痴線嘅人一定要比佢更加痴線」、「樓上無聲嗰陣就係佢訓教嘅時候，聽人講用毛巾綁鐵槌，用盡全力隊上去天花，棟樓會震，識玩就咁玩囉」。