杏花邨業主不滿被稱為颱風重災區　用「一人一信」抗議污名化　連街坊都鬧埋

Sep 4 2023

今早（9月4日）天文台因颱風海葵而發出1號風球，料日間長時間維持。而每逢打風，香港總有幾個地方會被特別關注，杏花邨更是常客。不過最近經歷完超強颱風蘇拉後，有杏花邨業主竟稱要發起「一人一信」計劃，指相當不滿杏花邨每逢颱風日子都被污名化，更怪責居民「拍片外傳」，力數3大打擊要港人「收口」，結果惹來熱議。

杏花邨業主不滿物業每逢颱風天都被污名化：知唔知有幾影響樓價？

每到颱風襲港日子，不少傳媒機構甚至市民都會專登去到杏花邨拍攝颱風威力，事關以往每逢有超強颱風襲港，杏花邨的停車場及住戶都嚴重「受害」。不過最近疑有杏花邨業主在網上不同平台發帖文指「拒絕再將杏花邨污名化」，認為業主委員會及一眾居民應抗議外界把杏花邨形容為「風暴黑點」、「重災區」等字眼，指「完全是把杏花邨污名化，名不符實，絕對不可接受」。

發言怪責居民：點解要拍片擺上網？

網民同時發言指責杏花邨居民，指「街坊點解要將屋苑實況拍片再Upload上網？完全唔明擺上網同WhatsApp畀人做咩，畀D藉口人推跌樓價」、「個個睇到呢D片，買樓嗰陣都會令人考慮多一層啦」。有同意帖主說法的網民指「周圍都有塌樹同水浸啦，而家得杏花邨一度吹到爆窗咩，嗰D又唔見係咁講」、「有D屋苑仲得人驚啦，我哋呢度算得D咩」、「當風位係政府管轄嘅公園，唔係我哋住宅喎，搞清楚未」。

網民鬧爆：呢個時候仲掛住錢？

不過亦有網民反駁，指打風時最緊要人命安全，杏花邨情況屬港人知情權，「唔影相拍片，D人點知呢度咩情況，點會下次有風嚟之前做好準備」、「停車場浸壞D車係事實，而家你連事實都唔畀人講啊？返去第2度啦你，呢個時候仲掛住錢」、「山竹、天鴿唔記得杏花邨變成點？唔係呃Like喎，係要畀D人知有幾嚴重，過嚟清理密D救人喎」、「肯定係自己層樓賣唔出，喺度搵人出氣」、「你都無腦，咩都睇層樓幾錢幾錢，你自己叫高價咋掛」、「建議你下次打風落樓趕走晒D記者，一人一信係無用㗎On_」。