日本櫻花妹妹等緊單身港男！ 日媒調查與港男拍拖10大好處

10個與港男交往的好處

第10位：可以經常去海外旅行！

香港被譽為國際大都會，唔同國家嘅文化集中於一地，特別係日本文化，就算離鄉別井都唔會太陌生難適應。加上香港人又鍾意出外旅遊，四圍去唔同國家玩。而且香港國際機場嘅航班數目非常多，又有唔少平價嘅廉航，真係話飛就飛！

第9位：香港係美食天堂

問唔少人對香港嘅印象，除咗李小龍之外，離唔開答你係美食天堂。要喺香港食盡各國美食，的確係無難度！淨係香港嘅特色美食、街頭小食已經又平又好味！

第8位：會增強健康意識

日本人認為香港比較少肥胖人士，市面上有好多健康食品專門店、健身室、瑜伽中心等。加上論數據顯示，香港係全球平均壽命最長嘅地區，所以如果同香港人拍拖，會覺得自己都要努力維持健康。

第7位：身體接觸多

亞洲男性總係畀人一種保守啲嘅感覺，喺條街度唔會同女朋友有太多身體接觸。不過香港完全唔同，因為直到1997年香港都係英國殖民地，可能文化上近似歐美國家，拖手仔、goodbye kiss呢啲身體接觸比較多。

第6位：隨時可以用手機聯繫對方

日本人認為香港男性只要一有時間就會send短訊畀對方，可能因為香港人工作效率高，可以同時兼顧返工同搵女朋友傾計。另外，而家落街唔難見到戴住Apple Watch嘅人，好簡單快捷就可以覆到短訊！計我話兩件事無抵觸，係睇有無心嘅啫（笑）

第5位：重視雙人之間嘅特別日子

香港男性對於雙方之間嘅特別日子非常重視，例如情人節會送花同食飯；聖誕節會準備禮物；生日會有浪漫驚喜等等，特別日子都會一一慶祝。相反日本人會隨住年紀大，就唔會特別慶祝。

第4位：香港男性精通多國語言

因為香港嘅教育基準，香港人除咗基本嘅廣東話，亦會有「兩文三語」喺學校學識普通話同英文，唔少人仲會視學外語為興趣，走去學日文、韓文、法文等等。所以佢哋覺得同香港人出外旅遊唔使擔心溝通問題，同埋會大大增加旅行嘅樂趣！

第3位：香港人憧憬日本

要數香港人最鍾意嘅國家，日本一定係榜首！每年香港都有過百萬人去日本旅遊，就算因為疫情無得返鄉下，走去Donki望下長長嘅人龍，就知香港人對日本嘅愛有幾大！加上香港男性憧憬住可愛斯文嘅日本女性。

第2位：做事認真，令人安心

畀做事超認真嘅日本人讚香港人認真，真係榮幸（笑）日本人認為香港男性嘅整體印象都係做事好認真，可能因為學校定職場嘅競爭好大，喺高壓環境造就出認真嘅性格！

第1位：溫柔體貼

最後亦都係最重點，就係香港男性夠溫柔！出街拍拖會好有紳士風度，開門畀女性入先、讓女性先坐低、最後會送女仔返屋企、病咗會細心照顧等等，都一定以對方著想為先，所以同香港男仔拍拖會好幸福。

睇完以上頭十位，唔知大家有無多返啲信心呢？始終一樣米養百樣人，加上無人係完美，不過朝住呢十項去努力，相信機會一定會有，下一個飛雲可能就係你！