加強打擊Uber 傳連乘客都捉！車行叫熟人準備炒的士牌

傳六月會開始打擊Uber

以市區的士牌為例，牌價由2015、16年高峰期$723萬高位，跌到而家$350萬左右，已經唔見咗一半有多。呢幾年uber當道，的士牌前景黯淡，不過近期有朋友話收到風，有人同佢講，政府今年六月會開始打擊Uber，所以市場上有一陣「炒的士」風潮悄悄地出現。

乘客分分鐘可能連坐Uber都唔得！？

根據現行法例，私家車必須要先領取牌照，先可以取酬載客。唔遵守規矩，首次定罪可處以最高$5,000 罰款同埋監禁 3 個月；再次定罪可處以最高 $10,000 罰款同埋監禁 6 個月。條例主要係規管司機取酬載客行為，乘客理應唔會有事。

的士車行叫熟人摸貨

消息指今年六月之後，分分鐘可能連坐Uber都唔得，所以有車行叫熟人依家買定一個的士牌，的士牌牌主依家先收一成訂，到六月正式有消息公布之後，的士牌就會炒上，然後升值，買家可以摸貨賺錢。即使唔賣，到時總共俾三成首期，上會收租都唔錯，當幫自己供車。

的士已經供過於求

政府會唔會進一步打擊UBER，我就唔敢講。我只係奇怪，咁好搵嘅話，又點會有車主同車行比你賺？另一方面，聽聞就算上會出租的士，都有機會租唔出，因為依家愈來愈少後生仔肯入行揸的士。根據運輸署2022年年報，當年已經報考的士牌人數超過13,000，但2023年年報就得番7,000幾，跌幅超過一半。隨著的士司機年紀漸大，退休嘅退休，唔撈嘅唔撈，就算今日宣布唔可以再揸Uber，但市場上都唔夠的士司機，的士供過於求又點會租到好價？

原文：經濟一週《凍鏈茶專欄》