婚禮司儀發癲37次實錄！成個婚禮被「炒㷫」：竟然叫我老豆錫外母

婚禮司儀如何「炒起」一個婚禮

婚禮始終是個講「意頭」的場合，如果個司儀「唔生性」、「講錯嘢」，大家你眼望我眼，搞到氣氛好尷尬，對一對新人來說就是一輩子不能忘記的回憶！以下是網民提出的部分例子：

自high系列

• 「婚禮司儀係一男一女，外面請，無人識，無啦啦去到中間，男司儀話個女司儀今日生日，要全世界陪佢唱生日歌 + 畀驚喜個女司儀！」
• 「婚禮司儀講講吓嘢講到喊晒，然後話原來個新娘係佢鍾意咗好多年嘅女神，然後無啦啦大叫咩『哈利路亞 CHANCE』！」
• 「婚禮司儀:『我叫 Martin 佢叫 Candy，所以我哋係MC！』」
• 「新人同家人親戚朋友影相，影影吓，個婚禮司儀嗌：『而家有請MC上台影相！』，然後自己衝上台」
• 「個婚禮司儀玩到無嘢好玩，無啦啦叫我老豆咀我老婆個老母，下面班XX仲大大聲叫咀佢！咀佢！搞到我外父同我老母黑晒面 !!!」

開口夾着脷系列

• 「婚禮播出席前音樂：好心分手」
• 「親戚喺茶樓擺咗十零圍，有個駐場婚禮司儀：『雖然今晚圍數唔多，但我地都用最熱烈嘅掌聲歡迎一對新人。』」
• 「婚禮司儀：『歡迎一對乳豬…新人進場。』」
• 「婚禮司儀：『新郎依家可以揭起新娘嘅婚紗。』」
• 「婚禮司儀：『今日係對新人第一次結婚，有啲緊張！』」

• 「新娘肥肥哋叫Mandy，播完片，新娘進場之前，男婚禮司儀：『嘩Mandy真係好肥美啊，大家話係咪啊？』全場dead air，女婚禮司儀：『係啊真係好肥美，喂，大家畀啲反應吖！』」
• 「婚禮司儀：『喂，新郎哥，依家後悔仲嚟得切！』點知個場真係靜咗三秒。」
• 「播新人成長片段播錯成人動作片，成個場嘩聲四起，但新郎塊臉紅晒，但好似睇得幾開心。」
• 「婚禮司儀：『大家無反應嘅？係咪睇片（成長片段）睇到攰啊？』」
• 「婚禮司儀：『個蛋糕代表住新郎同新娘嘅感情，我哋依家一刀切落去。』」
• 「切蛋糕嘅時候，婚禮司儀話：『我地祝對新人由頭切到落尾。』」
• 「婚禮司儀：『多謝老爺嘅分享，請老爺落台！』」
• 「婚禮司儀：『新人可以上床影大合照。』」
• 「婚禮司儀：『有請新娘新郎離開』新郎糾正：『係就坐呀』」
• 「婚禮司儀：『跟住落嚟就係今晩最重要嘅環節，上菜！』」
• 「婚禮司儀：『今晚嘅婚禮為新郎、新娘畫上完美嘅句號。』」
• 「婚宴完嘅時候，婚禮司儀：『我哋下次再見！』」
• 「婚禮司儀：『今日嘅婚禮圓滿結束，我哋一定會再見㗎！』」

大吉利是系列

• 「婚禮司儀：『多謝大家嚟到xxx同xxx嘅喪禮….呃…婚禮！』」
• 「婚禮司儀：『呢對新人終於去到人生最後一個階段…』」
• 「婚禮司儀：『恭喜曬兩位新人喺茫茫人海都搵到對方，一齊行埋人生最後一段路⋯』」
• 「婚禮司儀：『恭喜一對新人走上呢條不歸路……………..幸福之路！』」
• 「婚禮司儀：『祝新人百年歸老，永結同心。』」
• 「婚禮司儀：『依家有請一對先人，同佢哋父母出場。』」
• 「婚禮司儀：『世伯伯母睇到佢哋仔女今日咁溫馨同幸福，真係老懷安息啦。』」
• 「婚禮司儀：『我哋一齊睇番一對新人生前嘅片段。』」
• 「婚禮司儀：『有請新娘屋企人上台影圍照（令人聽成遺照）。』」

• 「試過去飲，新郎新娘多謝完四大長老之後，婚禮司儀話: 『多謝完就要有啲表示啦，我地依家請新郎新娘向父母三鞠躬致謝。』，新郎新娘又真係照做，四大長老塊面黑到！」
• 「試過個婚禮司儀叫: 『有請女家外母慈雲閣嘅鄰居』，外母住慈雲山啲屋村，但係慈雲閣係放骨灰果啲寺。」
• 「婚禮司儀：『有請寶福山（骨灰龕場）嘅朋友上來影大合照…寶馬山先真。』」
• 「婚禮司儀：『有請一對新人輪迴一周。』」