太安樓名店「魚蛋佬」被網民轟刻意湊人龍　力數3罪指越做越衰　老闆：無腦

太安樓名店「魚蛋佬」被網民轟手腳慢

有港男拍下一張太安樓外大排長龍的照片，相中可見排隊輪候「魚蛋佬」買小食的客人由舖頭排到足足4個舖位之遠，人氣相當高。而港男更在帖文內指「魚蛋佬每日生意額有冇至少 5 皮，不過我剩係知道佢慢手慢腳皺慢篤俾你」。言論更惹來部分網民認同，指「做野慢吞吞喺度造勢」、「排成粒鐘買串魚蛋食… 有咁既需要嗎？」、「真係咁好食？利申: 我仍未幫襯過。話時話，真係懷疑佢係有啲配料？或食咗會上瘾，啲人要定時定候來排隊頂癮？」、「我細個啲魚蛋佬莫講話篤一串魚蛋，篤幾串魚蛋十分快，收錢更快，講完」、「以前得阿伯喺度都好快手，唔明點解而家2個人都慢手慢腳」。

更有人指「魚蛋佬」現時大不如前，指「個魚蛋佬，90年代佢老竇擺車仔檔，一放學就去買魚蛋，有次兜沙嗲汁乾晒水，佢老竇買一排益力多倒落啲汁，仲記得佢老竇講『有益力多啲沙嗲先好味』」、「我哋以前叫佢老竇做Hip Hop阿伯，以前佢個汁好食好多」、「佢老竇個醬係好食好多」、「而家佢個仔主理，我又覺得唔係真係咁好食，態度又串XX咁」、「佢同佢阿媽兩仔乸不嬲都好串」、「呢檔魚蛋真心係得個汁，無汁係無味可以收皮」、「佢老竇嗰隻快手真係無得比」。

港人反斥網民無理：不喜勿食

眼見「魚蛋佬」瘋狂被指罵，有港人看不過眼，留言護航，指「人哋有自己節奏，鍾意點做都得 ， 你覺得好搵咁入場同佢砌過呀嗎 」、「做野一定要快？邊嗰話一定要？ 法律寫明？」、「人哋點做生意係人哋嘅選擇，你係客人可以選擇排隊買或者唔排隊唔買唔食，因乜解救喺度指指點點呢？」、「呢個post都幾多人生百態，人哋慢又要X，慢你咪唔幫襯囉，慘得過有人肯等。人肯等又要話人蹝時間為串魚蛋排隊，係咪想顯得自己高人一等啲，精明啲」、「你想快可以去另一間。嫌人慢？畀幾蚊就嫌人慢？你老闆畀幾錢你？」、「你估佢想咁好生意㗎？人手得咁多想做死人咩」、「呢度有啲人留言無成本，我就淨係信事實，事實就係人哋晚晚排長龍收錢收到手軟，呢度某啲人就淨係話人哋個囝唔掂，話人哋老竇以前點點點，講到佢個囝晚晚好似唔洗做unun腳坐喺度收錢咁樣，唔掂就自然無人排隊啦」、「不喜勿食」。

魚蛋佬老闆曾表示「話我專登慢嘅人都無腦」

而魚蛋佬老闆蔡先生曾接受傳媒訪問時表示，這間店由50年前爸爸的車仔檔做起，後來爸爸因身體不適，身為兒子就「落場幫手」。現時檔口由他和媽媽兩個人經營，因2人身體不太好，需要休息，每個月都會有8-10日「唔做生意」。而蔡先生當時表示，自己沒有想過要發達，只要夠交租和「有份糧」就足夠，所以每天只開下午5時-12時。至於多年來被人指責「特登做慢啲，整條人龍出嚟造勢」，他指「講呢啲嘢嘅人都無腦」，認為「我一日開幾個鐘，一個月先開十幾日，做得慢咪無錢，我做得快先有錢㗎嘛，如果唔係我排條人龍排到鯉景灣都無用」。