叫外賣壽司拼盤大移位變「刺身丼」 食客嬲爆發文公審 外賣平台咁處理

外賣災難：壽司變「雜錦丼」

樓主在Facebook群組「真.屯門友」分享事件，他表示農曆新年期間經外賣平台Keeta，向區內某間壽司店訂購一盒32件的「花漾海鮮宴會」拼盤，價值$328，另加上$22運費、$2平台服務費，再減去$97.2折扣，樓主總共支付$264.8，但送上門的外賣賣相卻變得體無完膚。從樓主附上的照片見到，該盒壽司拼盤全部大移位，32件壽司全部倒在盒中的一側，魚生從壽司飯上脫落，壽司飯黏在一起變成一團，樓主怒斥「嬲到震，新年流流叫個外賣，送啲咁嘅嘢過嚟？」、「我出街食冇咁嬲」。

雖然後來投訴後有收到退款，但他留言補充表示，如果當時外賣員親手把外賣交給他時，有清楚解釋指「（外賣）炒咗車」的話，他一定不會投訴，但對方卻只是把外賣放在門口後馬上離開，自己亦沒有收到任何取餐通知，「仲要一打開就咁樣」，自己才會動怒去投訴及要求退款。

網民笑爆：變日式海鮮炒飯

帖文引起網民熱烈討論，不少網民笑指許壽司拼盤變成「魚生飯」、「刺身丼」，笑言「炒一炒變日式海鮮炒飯」、「外賣應該跌咗樓梯碌咗成層樓」、「唔緊要啦，撈埋一齊當刺身飯囉」、「啲壽司地震嚟」、「唯有擺埋一碗當魚生飯，撈一撈風生又水起，開心啲」、「蝦尾都飛埋出嚟，我就唔敢食啦」；另外，有網民估計外賣員在送餐時橫衝直撞，才會令壽司拼盤「大地震」，「而家啲外賣員行人路飛單車橫衝直撞，落到馬路又無視其他交通使用者，真係得個快字」。