冒險樂園扔彩虹「幣大過圈」被稱為史上最大騙案　官方最新回應

美國冒險樂園回應扔彩虹事件：對不實指控深表遺憾

美國冒險樂園顧客服務部回覆傳媒時指，公司對屯門華都商場分店的一宗「幸運彩虹」個案已作初步調查，分店經理按照公司指引及判獎準則，因見代幣與黑界重疊，當時因而向顧客表示代幣不中獎。經講解後雙方仍未能就判獎達成共識，故經理用手機以俯視判獎角度指下代幣照片，向顧客展示及進一步講解。惟顧客仍認為代幣中獎，並自行報警處理。警員到場後，分店經理擺放了一個中獎示範與顧客投出的代幣作出比對，同時到用手機以俯視角度拍下中獎示範予顧客觀看。經多番講解仍未能達成共識，警方建議顧客可從其他途徑跟進。美國冒險樂園強調幸運彩虹每一個圖案均大於代幣，不存在『代幣大於彩虹圖案』的情況，對於顧客作出的不實指控，公司深表遺憾」。

顧客再反駁：作為長期顧客我徹底失望

對於美國冒險樂園的公開回應，顧客隨即作出3點反駁質疑園方說法，詳情如下：

1.唯顧客認為代幣中獎

「我哋選擇報警嘅原因並非因為認為代幣中獎，而是認為綠色區域根本不足以放下一枚代幣」。

2. 同時再用手機以俯視角度拍下中獎示範予顧客觀看

「經理最後拍照的中獎示範仍然擇界，而我們亦有向冒險樂園索取當時判獎的照片，但至今仍未獲回覆。反而率先見到樂園對公眾的回應，請問當時經理的說話是否只是順口開河？或是樂園根本無心處理，逃避問題？」

3.顧客作出的不實指控

「請問我有那些指控是不實？正常人都知道 一個代幣在顏色區域有足夠空間的情況下，是不會觸碰到三條黑色線，既然彩虹是有足夠的空間，為何不公開我們當時判獎的照片讓公眾去判斷呢」，最後顧客指自己身為10多年的長期顧客，經過今次事件確實對樂園徹底失望。

冒險樂園扔彩虹扔到報警報東張：園內自家幣1陷阱根本唔會中！

事主今於Facebook群組「美國冒險樂園關注組」中再詳細解釋事件因由，事關他10月7日到華都分店掉彩虹足足扔了2000個幣，每次扔中綠色都會叫職員「睇獎」，惟對「點睇都唔識中，睇嚟睇去都話擲界」，而且不止他一人，同場客人同樣出現相同情況。

事主再扔中綠色位置，經理又因硬幣碰到直線為由，稱「唔中獎」，但事主指「明明我哋左右前後睇3邊都仲有顏色」，於是經理由俯瞰角度影相，結果「睇完真係勁，影到我三邊都掂界」，令事主相當好奇「一個中咗嘅彩虹，點會3邊都掂到界？」，向經理提問，對方竟叫事主「呢種情況要申報，你可以向CS索償」。事主聽罷認為「得啖笑」，於是直接報警。

警方到場後更離奇事件再發生：擺咗幾分鐘都擺唔到出無擲界嘅情況

警方到場後，稱從肉眼看的確掂咗界，亦指「沒有發現任何犯罪元素」。但事主指重點是「相機影出嚟，我闊度根本唔夠中，我叫佢擺一個『中到綠色而又唔會掂界嘅示範畀我睇」，誰知店方擺了幾分鐘都仍然擺不出，更說了兩件事主形容好戇X的事：

1.「上、下都掂界時仍當中」

店方指「呢一種上下都掂界的綠色，店方都會當中獎」，事主即提出：「咁點解我個藍色（下圖）唔中？你話咁都比，點解呢個無？」，事主認為「中唔中係睇店員心情，阿Sir喺度先咁講，根本係可能中到一個標準嘅綠色」。

2.「iPhone影唔算數，只認Andriod影出的照片」

事主又指自己電話的照片是用iPhone拍出來，而經理此時竟講笑話狡辯由於有廣角因而會有偏差，事主即指『咁啱我手上呢部係Android，你用嚟影張相睇，但對方最後拒絕」。

事主報海關兼報東張：佢好多分店都係咁

事主指自己並非第一次扔彩虹遇到這種事情，早前在又一城分店已明顯看到綠色位置「無位中」、慈雲山分店「永世又唔會中」。事主指由於不懂得如何處理後續事件，因而已報東張及海關。網民看到事件亦表示「終於明晒點解無中」，指「其實個幣根本大過晒個彩虹，佢Set機制話掂界就唔計，根本就係內設呃你錢」、「完全違反商品說明條例啦，以後點去玩」、「根本詐騙，為咗呃錢，條界又無得度，陰D陰D縮窄顏色」、「帶小朋友玩都係想開心吓，咁都要呃」。

冒險樂園一個幣值$2　最抵玩係葵芳？

而一直有玩開的市民紛紛留言，指部分分店的闊度明顯不同，如葵芳恆景的彩虹闊度足以大過代幣，「玩過咁多間，呢間最易話中同抵玩」，眼見事主花了2000個幣，以$2一個幣來計，「大大話話都$4000，即使有Package價都好唔抵！」、「歡樂天地個D先係正統扔彩虹」。