低價團逼爆巴士代替旅遊巴　行李層層疊嚇窒港人　司機1回應再被鬧戇X

Sep 7 2023

向來有不少平價旅行團從內地來港，站街邊吃飯、1日走10個行程都不再話下，但現時這些平價旅行團竟為慳錢而出一招數——巴士代替旅遊巴！近日有不少港人在網上表示越來越多巴士被逼爆，更有人拍到一實況圖分享到Facebook群組「青衣街坊吹水會」，情況相當誇張！港人見到後紛紛鬧爆，而有一路線更特別嚴重，有人指自己曾向司機反映問題，惟對方稱無辦法，更指會向公司提出一建議，但令港人聽到後嬲爆，指「離X晒譜」。

巴士被平價旅行團當旅遊巴　港人：真係癡線㗎！

內地低價團為慳錢的手法層出不窮，近日有港人在Facebook群組「青衣街坊吹水會」貼出一照片，指乘搭巴士時幾乎每天都有一個情況發生，指「真係痴線！架948變咗旅遊巴！修頓球場之後嗰啲站一個人都上唔到！修頓球場個站都已經有一半人係上唔到」。從照片中可見，巴士下層堆滿行李如層層疊，更沒有人扶實行李，通道更逼滿至無法行走」。有街坊留言，指自己搭同一班車，「當時呢班人嘈到癲，佢哋係由修頓上車直到去青衣青桃樓個站，一到呢個站就全部人落車，仲要有導遊幫佢哋搬行李落車」。

而除了948巴士外，有人更留言指42A都有同樣情況發生，據知這些低價團都住在青衣藍澄灣附近的酒店，他們出入都是搭巴士。有人形容「見到佢哋落車嗰陣真係極震撼，佢哋落車之後成架車係空晒」。而一眾網民看到此景象後紛紛鬧爆，指「咁搞洗真係好危險，真正的累街坊」、「咁樣疊晒上去，一比大油d都飛晒落嚟」、「咁樣好危險，有位都唔好上，擺明超過可帶上巴士嘅size行李，司機怕事唔出聲」、「每晚6點開始到11點前都係咁，試過等2班車都畀佢哋逼爆」。

司機無奈稱難阻止　反提1建議被港人鬧戇X

除了乘客和網民「睇到O咀」鬧爆低價團外，更多人問責司機，質問「點解咁都畀上車？」。有網民留言指當時向司機投訴，惟司機指「無辦法，佢哋每人拎一件行李又無超過Size，我阻止唔到」，另外更提一解決方法指「我向公司反映情況，叫佢哋專登關幾班有行李位嘅巴士行呢條線啦唯有」。誰知司機一句瞬間激嬲港人，狠斥「係咪戇X，你而家唔係解決問題，你係縱容佢哋喎」、「咁948咪變咗機場巴？你搞清楚呢條巴士線用嚟做咩未」、「咁咪者係巴士真係變咗旅遊巴囉」。