港人斥迪士尼森林河流之旅改制玩殘船長　聽介紹聽到急口令咁：還我廣東話

森林河流之旅又改制！　船長一次過要講3種語言惹不滿　遊客：完全趕客！

有網民於網上分享指，森林河流之旅繼早前喺等侯區將三種語言合併成一條隊，到上船前先再分語言後，近來園方再將三種語言位合併於同一艘船上面。換言之，船長需在同一隻船上講舊中、英、普三種語言。就園方而言，此做法或可增加載客量並縮短等候時間，但「船長要同時兼顧三種語言，同樣縮短緊佢講嘅內容」，說話時要同時間競賽，令整體遊樂體驗大幅降低」。網民又指，「全球其他樂園嘅Spiel 都係以自己嘅地方語言為主，用兩種語言嘅都有，係香港迪士尼先會咁特別有兩文三語，本來分開係相安無事，但合併咗就令問題浮現」。

網民：聽完都唔知佢講緊乜

有不少在改制後入場的網民紛紛加入討論，指「以前坐，好欣賞一啲CM 講得好精彩，成首船賓客都好投入，而家聽到我哋好混亂，唔係每一個人都識英文或者普通話，我只係想聽返自己熟悉的語言，而家咁樣好混亂」、「前日去玩見cm好似急口令咁，完全無停過，真心覺得佢地收工後應該會喉嚨痛」、「完全冇曬之前嗰隻氣氛」、「還我純廣東話」、「聽完都唔知佢講緊乜，講得隻象嚟已經走咗唔知去邊」。亦有網民好奇「到底夠唔夠時間講晒」，有網民即抽水指「可能精簡哂….你睇隻象仔；Look! The baby elephant；呀！你看，有只小象」。

另外，亦有網民質疑是否國泰風波後，人人自危，因而轉做法，並指「如果咁玩嘅話，學地鐵咁到嗰個位用錄音廣播咪得囉，就絕對唔會有咩歧視嘅事發生，更加唔會講錯講漏嘢」、「遲下變到冇人氣，就可以步入Autopia 嘅後塵，之後咁大塊地移平咗佢，慳返好多管理費同維修費」。

資料來源：This is Mr.B