率先試住！澳門 永利皇宮 5大必睇位

撰文:Elaine | 攝影:Yee

1. 永利皇宮 纜車 3分鐘載入宮

皇宮外有纜車，搭3分鐘直達宮內1樓，每位入場費MOP$100，記者試搭入宮，車速甚快，眨眼就升到表演湖上方，沿途會繞過湖兩邊的巨型金龍，記得把握機會影相！纜車有2個上車位，由地面上車可直入酒店1樓纜車大堂，票價包坐來回，地面至酒店為半程，而繞湖一周共需6分鐘。建議大家夜晚來坐，因為下方表演湖有噴泉表演，入黑後七彩繽紛更靚！詳情請睇下文。

金龍上方的齒輪是纜車的轉向盤，轉運時比海洋公園吊車更加劇震，全程共5個齒輪，大家小心震親。

瑞士製纜車可容納6人，需與他人共乘，升到高處時居高臨下賞湖景好靚！

2. 情侶BB必去！夜間浪漫噴泉show

纜車下的人工湖，每15分鐘一次噴泉show，朝早11點狂loop至午夜12點，全長3分鐘。早知噴泉show夜晚時有七彩繽紛的燈光，我梗係食飽飯後先去睇，聽講湖裡裝有1,006支噴水管，水花從湖底升起噴得超澎湃，仲有輕快英文歌伴奏！睇咗幾轉，最後嗰次播《My Heart Will Go On》，旁邊對情侶摟到實一實，勁冧豬～

建議於上一轉表演結束後約13分鐘，於酒店1樓上車，就包睇到表演！留意唔好在地面上車，因上到酒店1樓需要全體下車，會錯過表演！

位於酒店2樓的泳池，有間pool cafe，對正表演湖，可欣賞到噴泉表演！

3. $0入場 皇宮打卡位

宮內雖然迫滿人，但我發現好多都唔係住客，而是湊熱鬧的遊客！原來宮內有大量靚靚裝置，專for大家影相打卡，唔使入場費，$0就可玩轉皇宮！宮內分東、南、北3個大門，各放置了浮誇花藝雕塑：東門是穿梭巴士站，內有6朵彩色吹氣鬱金香，是美國藝術家Jeff Koons的作品，行近自拍可從花上見到自己的倒影，又幾靚喎，我指朵花～還有南門的旋轉木馬和北門的摩天輪，由著名花藝師Preston Bailey用過萬朵鮮花創作，花痴少女必到！

第1站：東門
一落穿梭巴士，直入會見到鬱金香雕塑，由美國知名藝術家Jeff Koon製作。

第2站：北庭園大堂
摩天輪用了過10萬朵花製作，更加裝了機械裝置會不斷轉動！

第3站：南庭園大堂
花花旋轉木馬，從摩天輪的北庭園直行便抵達。

順帶一提，宮內有免費wifi，收得好好。

東門有穿梭巴士站，可至氹仔碼頭、港澳碼頭、官也街、關閘和蓮花口岸。

4. 歇腳餐飲推介

行到攰，皇宮有咩好食？宮內有多間餐廳，自助餐、拉麵、中菜、日式料理等，但當然唔平喇，好彩亦有平民價選擇。最推介「甜藝廊」，$32有高質酒店雪糕歎，另亦有$35窩夫或煎餅，啱晒下午茶坐低抖抖。旁邊仲有間Starbucks，裝修到古代宮廷咁，唔愛甜品可入去飲杯啡。

雪糕有多款口味如果仁、栗子、野莓等可選，細杯$32，大杯$42，甜筒或杯裝均同價。

環境似故宮咁古典，原來係Starbucks！壁畫中的古人都拎住杯Starbucks，又幾有創意。

另外，酒店內有間「永利馬卡龍」，有唔少遊客會去買返盒做手信。1件單售MOP$28；2件禮盒裝MOP$80；6件MOP$198。

5. 千呎皇宮套房實錄

皇宮有7種房型，坊間套票通常做較基本的「皇宮客房」或「表演湖景套房」。皇宮房面積偏大，一般5星酒店基本房約5百呎，但「皇宮客房」有840呎，連小客廳的「湖景套房」則達1,150呎！我住的是千呎湖景套房，以橙和米白色為主，幾簡約雅致，無想像中咁土豪喎，而且隔住玻璃睇噴泉表演勁似去咗Vegas！如經旅行社訂房，「皇宮客房」連船飛每位$1,099，但留意只得部份房對正表演湖睇到噴泉，如想包睇到表演，就要畀貴$500住「表演湖景套房」喇！

浴室使用英國品牌Molton Brown，鏡上還有LCD電視屏，設計高檔。

房內提供勁多款茶葉、小食，價錢由MOP$55起，仲有盒叫「私密」，唔知係咩呢？

貫徹宮廷風，連把梳都係土豪金色。

澳門永利皇宮
地址：澳門路氹體育館大馬路
電話：+853-8889-8889
交通：氹仔碼頭乘酒店巴士約10分鐘
網址：wynnpalace.com

$1,099起　2日1夜永利皇宮套票

訂購日期：即日至2017年1月27日
入住日期：10月7日至11月30日（9及12月貴$100）
周末價格：周四$1,159；周五$1,499；周六$1699；周日$1,199
另包：來回氹仔船票、纜車門票
查詢：搵房2　2311 8948