澳門摩珀斯酒店 Morpheus開幕！Zaha Hadid流線形Sky Pool+超豪別墅公開

Jun 14 2018

澳門幾乎每年都有新酒店落成，而且間間都是豪華至極的五星酒店。新濠天地旗下的第三期酒店 Morpheus 摩珀斯終於在6月15日開幕。記者提早於開幕前一日搶先試住，一覽Zaha Hadid大師級遺作的神秘面紗！

撰文：Kassidy｜圖片來源：Day、官方圖片

摩珀斯酒店 Morpheus 建築大師遺作落戶澳門

興建多年，每次經過新濠天地都只見到酒店外型已覺震撼，不過直至開幕前一個月，酒店連餐廳設施、酒店房型以及價位，統統沒有相片流出。全球第一間用「自由形態外骨骼結構」的摩天大廈，由已故建築師 Zaha Hadid 設計，全間酒店提供 770 間客房，仲有非常勁的水療中心，今日終於揭開神秘面紗！

科幻大堂子彈升降機

一踏入酒店大堂，就知道Zaha Hadid大名非虛，同樣由她手筆下設計的Poly理工大學大樓完全是兩樣風格，淨係 Lobby 都有 35 米高（約貫通16層樓），一入門口科幻感重的check in櫃枱後面是一排12架子彈𨋢，望上去上方更有幾何密集的天空樓層，坐上子彈𨋢完全充滿科幻感。

酒店話有另一個賣點，就係 12 部子彈全景升降機，1秒上到1層咁話，不過因為用觸控版面，好容易撳錯樓層，快就幾快嘅，不過只得42層要咁快趕住去邊？

甜品界畢加索 Pierre Hermé 統領酒店甜品

第一次去法國之時已經被 Pierre Hermé 的馬卡龍吸引，甜品界畢卡索的稱號絕非浪得虛名。今次團隊進駐摩珀斯，統領全棟酒店的甜品項目，食材大部份由法國進口，而且食譜皆來自法國總部，定必教人眼前一亮，只食甜品都夠晒滿足。不過價錢方面就⋯⋯未知，香港間 Pierre Hermé 都賣緊 20 蚊一粒馬卡龍，今次呢間應該跟隔壁 MGM 的 Janice Wong 不相伯仲。

離地130米倒轉睇Sky Pool！

泳池基本上都是澳門酒店的重點項目，今次呢間就將泳池設於40樓高空之上，本來滿心歡喜以為咁堅，澳門終於有個 40 樓高 Infinity Pool，原來只是一個 SkyPool，水深 1.2 米，兩邊都有落地大玻璃欣賞路氹景色，亦未有設置按摩池。想打卡的話呢度都有個天空之鏡，勢必成為澳門新泳池打卡熱點。