日本電車乘客票選擾民行為TOP15！最「乞人憎」第1位好多遊客都有做！｜好生活百科
撰文：C@GOTRIP｜圖片來源：Twitter｜原文刊於：GOTRIP
日本電車擾民行為排行榜Top 15！
第15位：於人多車廂內睇書（新聞、雜誌、書籍等等）
非繁忙時間就當然冇所謂啦！但係部分日本人認為，喺繁忙時間迫到唞唔到氣嘅電車中，打開書或報紙睇，係非常騷擾嘅行為！因為唔止要騰出空位隔距睇書，更會因電車搖晃而被書本撞到。
第14位：電子機器類的操作音（手機、遊戲機、電腦等等）
日本人對「安靜環境」非常嚴厲，最忌騷擾到其他人，按鍵時嘅「噠、噠」聲會令佢哋覺得好困擾！記得小心注意按鍵時發出嘅噪音喇！
第13位：優先座的禮儀
優先座同香港嘅「關愛座」一樣，係畀有需要人士優先使用，通常設於車卡嘅頭、尾兩端嘅3-4人席。唔少日本人都偏向避開優先席唔坐，雖然唔係唔坐得，但都係要留意番有冇需要讓座嘅人士啊！
第12位：在特定場所以外的地方吸煙
日本設有唔少「吸煙室」專畀吸煙人士使用，其他公眾場所都係禁煙嘅，需要使用嘅話，記得搵番呢啲專用室嚟用喇！
第11位：坐在電車地板上
即使唔係滿員電車，有時都難免搵唔到位坐，呢個時候就只能忍耐一下等空位啦！因為坐喺地板上不但不雅觀，更會阻礙到其他乘客走動。
第10位：於人多車廂內飲食
日本電車內其實並不禁止飲食，但係對於食味傳出嘅味道還是有點潛規則的。味道較強烈嘅食品，就要盡量避免於人多嘅列車上進食，因為味道會久持不散。
第9位：於車內放置垃圾、空罐
日本人對於環境乾淨嘅要求較高，所有食物飲品應該自攜離開，切勿弄髒環境！
第8位：在車內化妝
喺公眾場合下化妝，會被視為不禮貌嘅行為，想補妝或者搽唇膏都要到洗手間進行！因為化妝品嘅粉末等物料有機會散於空氣中而令人感到不適，而且有機會弄髒環境。
第7位：在醉酒狀態下乘車
酒醉時身體搖搖晃晃，唔單止容易整到人，更會有於車廂內嘔吐嘅危險！飲醉酒就最好唔好搭電車喇！
第6位：智能電話的使用方式
除咗傾電話，更包括於月台上邊行邊玩電話，唔睇路咁行好容易會撞親人，又或者阻礙他人去路！
第5位：耳筒漏音
噪音係日本人好介意嘅一環，太嘈會令人覺得你冇禮貌！即使聽歌，都記得要留意番音量會否太大而導致漏音！
第4位：上、下車時的禮儀
最緊要上車前排好隊，遵守先落後上嘅規矩，下車時要讓開，唔好阻塞門口通道！
第3位：座席的坐法
合攏雙腿，呈90度直角坐直，腿不向外伸出，保持足夠空間予其他電車使用人士！
第2位：嘈吵的談話聲、玩樂
都係嗰句，記得保持安靜環境！要傾偈嘅，就記得降低聲量。
第1位：隨身物品的拿法、放置方法
日本近年有款專門面向打工一族嘅背囊非常受歡迎，令揹背囊返工嘅人急速增加。但電車行駛時難免搖晃，令唔少人被背囊撞到而覺得困擾。並認為上車後應將背囊掉轉揹，放於胸前，避免撞到後方嘅人。
撰文：C@GOTRIP｜圖片來源：Twitter｜原文刊於：GOTRIP
