防蚊原來咁簡單！日本節目實測 蚊怕水都慳番！一招即可大大減低被蚊咬次數｜好生活百科
廣告
防蚊是夏天重要一環，天氣又濕又熱，濕熱的天氣最易招來蚊蟲滋生，惹蚊的人更是相當痛苦！被蚊子叮後除了覺得痕癢，還有機會因此得到傳染病，因為不少傳染病都經由蚊子傳播，所以防蚊措施一定要做好！日本節目《マツコの知らない世界》請來一位專門研究蚊子的天才少年，經過他的研究發現，只要簡單一招就可減少被蚊咬的機會！
撰文：Carmen｜圖片：《マツコの知らない世界》｜資料來源：《マツコの知らない世界》｜編輯：GW
18歲蚊子專家 養近4,000隻蚊！
這集《マツコの知らない世界》請來咗熱愛蚊嘅18歲少年，田上大喜做嘉賓。田上在約6年以前，就開始用自己做餌去樹林採捕野生嘅蚊，然後帶返屋企放入「蚊房」做研究，屋企養咗近4,000隻蚊！
交配後雌性蚊才吸血
用嚟飼養蚊嘅「蚊屋」係由田上自己用紙皮箱+膠樽自製，一箱大概有50-80隻！
田上指，會吸血嘅只有交配後嘅雌性蚊，咁係為咗得到足夠嘅營養產卵。所以除咗用蜜糖水餵蚊，佢甚至會「獻血」畀蚊！完全係當成自己嘅仔女咁嚟養。
O型血最吸蚊 A型血最防蚊
據調查所得，1年裡面「殺人最多嘅生物」頭5位，第1位竟然唔係人，係蚊！所以防蚊措施真係好需要㗎！
咁咩人會特別吸引蚊咬呢？曾經有過研究指，根據血型嘅唔同，受蚊「歡迎」嘅程度都唔同，O型最吸引蚊咬，而A型就相對地少蚊咬。但原來，血型唔係唯一原因！
腳上細菌愈多 愈易被咬！
田上經過研究同實驗後，得出一個新原因，就係腳上細菌多嘅人，愈容易被蚊咬！
人類體內以及皮膚上有稱為「常在菌」嘅細菌，顧名思義，就係經常存在喺人體內嘅菌，而呢啲菌嘅種類愈多，就愈惹蚊咬！
日本節目實測
田上搵來妹妹・千笑一齊做實驗，測試5分鐘內2人各自被蚊咬咗幾多撻！而結果係，妹妹腳上細菌比哥哥多近3倍，被蚊咬嘅次數達81次，而哥哥就只有25次！
雖然係做實驗，但叫個妹去餵蚊都未免太慘！原來田上係一見到有蚊停留，就會掃走隻蚊，並立即喺佢停留過嘅地方貼上紅色貼紙做計算及記認。
防蚊方法原來超簡單！
於是田上就諗到，出街前用消毒殺菌濕紙巾抹腳，可以有效減少被蚊咬嘅次數！佢再叫來妹妹做實驗，對比番殺菌前同殺菌後嘅被蚊咬次數，發現由81處，減至27處！總數減少至1/3！惹蚊嘅你，下次可以試下用呢個方法防蚊喇！
撰文：Carmen｜圖片：《マツコの知らない世界》｜資料來源：《マツコの知らない世界》｜編輯：GW
