職場無友誼 個個只係演戲？打工仔呻返工難識好朋友 網民建議：要保持呢個距離！

撰文：Katie ｜圖片：Unsplash｜原文刊於：經濟一週

日前，有打工仔於香港討論區以「其實你們覺得返工穩到好好朋友的機會大唔大？」為題發文，他表示自己工作多年，性格不內向，偶爾亦會與同事聊天，但他發現多年來並沒有在職場上認識到真心朋友。

「我有返咗好多年工的經驗，自問絕對不內向，會主動同同事講嘢！但驀然回首，好似沒有邊份工能搵到好朋友，都是離職之後一直都沒有聯繫…我不屬於內向，但心裡不想應酬咁多，同學聚會我都會去，同事好似真係沒人約我。」

人夾人緣？離職後更容易有成為朋友？

打工仔的帖文一出，引起網民熱烈討論。部分人認為「人夾人緣」，在職場上亦有機會認識到真朋友，更有人認為年輕時認識的同事更容易有深交。

• 「人夾人緣，我同不少舊同事都做到朋友，不時聯絡。」
• 「點只搵到好朋友，連結婚對象都好普遍啦…」
• 「睇個人性格社交…如果係掂，邊度都有朋友！」

又有網民認為，雖然機會不大，但只要雙方沒有利害關係，與同事亦有機會成為好朋友，而往往離職後更容易成為好朋友。

「未必無機會，條件係：
1.工作上無利益衝突
2.興趣接近，品格能夠互相接受
3.如果有兒女嘅，兒女年齡比較接近
4.同性會好啲，異性就差啲」

• 「唔大。因為始於有少少利害關係，好難純友誼做到知心友。不過，如果已離開公司，之後揾返仲可以保持關係，就可能得。」
• 「有啲可以做到朋友但唔好太上心，除非離咗職。」

網民：返工互相利用居多

雖然有部分打工仔認為可以在職場上認識真心朋友，但有人卻認為返工人人都有私心，又有利害關係，難以做到好朋友。

• 「有利害關係，有時晤係你死就我亡，與同事好難做到真心朋友。」
• 「好難搵到志趣相投嘅同事做朋友。」
• 「返工互相利用居多，無價值仲搵嚟做咩?」
• 「都係打工仔，心裡只有打工。好朋友係其他地方搵！」
• 「仲細咩，返工識朋友。傻啦，大家一齊做嘢，梗係諗計點樣整死對方先啦…」

大部分情況下「一出公司就係陌生人」

亦有網民舉例，指部分人「一出公司就係陌生人」，既然收工後沒有聯絡，更遑論成為朋友。

「一次我趕住返工，跟住搭扶手電梯時撞到一位同事同佢家人上緊嚟，塊面好似話俾我聽唔想見到我。明明見到我，簡單打個招呼都唔想，見到就即刻擰歪面，黑晒面咁…唔打招呼咪算囉！好似講到人哋得罪你咁…正所謂山水有相逢。」

「返工個個都係做戲，個個都（星期一至六）日日見住，放假仲要見？邊度真係做朋友㗎？」

網民：人走茶涼都唔係𠵱家先講

即使有人認為辭職後成為朋友的機會較大，但實際上「人走茶涼」。

• 「𠵱家連鄰居都唔會知姓咩嘅年代，返工又點會識到好朋友？返工時日日對足8至10個鐘都好，幾夾都好難有真朋友。人走茶涼都唔係𠵱家先講。」
• 「收工之後都無聯絡，仲講離職後。」
• 「其實同事之間只因工作才一起交往，既然已經離開公司，除非有共同嗜好，咁又有咩理由一齊呢？」

網民建議：唔好太親密，唔好太疏遠

雖然與同事相處黃金法則，但有人卻勸樓主應隨緣，不應期望能與同事成為好朋友，就算成為朋友亦非好事，更多時候與同事的關係只須保持「唔好太親密，唔好太疏遠」即可。

「返工唔一定識到好朋友就叫好事，大家同一間公司，做事以個人利益為先，如果你識到同你夾朋友，但上司一句唔鍾意你，就係悲劇。到時你朋友個心都會隨波逐流企上司嗰邊，隨時背叛咗你都唔知。

一間公司，你要認清楚同事佢哋之間關係，你自己心態都唔好太過單純，適當時候要有警戒心，因為同公司同事變成朋友比較難。

我過往打工都試過有個同我好friend，成日同我飯堂食飯甚至收工一齊行街，但我有一個上司唔知咩理由好唔鍾意我，跟住嗰個同事第二日之後後，扮唔識你，同佢打招呼都唔睬你…..現實係好殘酷，所以與同事之間嘅關係唔好太親密，亦都唔好太疏離，適中就得」

• 「工作只為了賺錢，沒有打算識朋友。放工就回家，沒有應酬，所以每份工作都沒有認識好朋友。在公司工作，跟同事維持最基本關係。上班下班打招呼，午餐獨食，工作時間不閒聊吹水。但如果上司叫埋同事大家一起午餐，自己也會參加。同事只是在相同地點共事的人，並不是朋友。自己不會八掛同事的私事，也不會公開自己的私事。其實公司同事個個都這樣做法。」
• 「隨緣啦，同事傾得埋，唔會面左左咪得，唔好話要做好朋友咁大期望喇，職場如戰場。」